A thiannu na taka kutthlaktua puh, Laldingngheta (24), Chawlhmun, Aizawl chu manin jail-ah an dah lut tawh niin police hotuten The Zozam Times an hrilh.
Laldingngheta’n kut a thlak nia sawi hi hliam nasa tak tuarin damdawi inah enkawl mek a ni.
Police hotuten The Zozam Times an hrilh danin hmeichhe sawisatua puh hian Thawhtanni zing lam dar 1 vel khan a thiannu, kum 28 mi, Remsangpuii kut a thlak hnuah a tlan bo nghal a, nimin khan man niin jail-ah dah luh nghal a ni a. Zonuam Police Out Post-ah thubuai – IPC 307, 324, 326 leh 307 te ziah luh a nih thu police hotute chuan an sawi.
Thudawnnain a sawi danin Laldingngheta leh an thiante chu April 16, 2023 (Pathianni) chawhnu khan Setlak luiah an kal a, an haw lamah kuthlaktu leh kut tuartu hi an inhnial a, a mipa zawk chuan a haw phal lovin an inah pawt lut luiin a room-ah inkalh hnanin thira a vuak bakah a kutzungtang pathum a tansak a, a hmaiah hliam na tak a tuar bawk.
Laldingngheta’n a thiannu a sawisa thawm hriaa an thenawmte an tlan luh chuan mipa kuttuar nula chu thisenin a lo bual khat vek tawh niin thudawnna chuan a sawi a, a kutthlaktua puh chu a tlanchhe nghal niin a sawi.
He thil thleng hian a rilru a tihnat thu leh pawi a tih thu Chief Minister Zoramthanga pawhin Instragram kaltlangin a sawi a, “He nula chunga hleilenna thleng hian mi mal tak pawhin min tina hle mai,” tiin, Mizo mipate chu ram leh hnam tana thlamuanpui tlak, heichhiate tana innghah ngamna an nih thin thu laia hetiang thil a thleng chu a pawi a tih thu sawiin, Mizoram Police-in mipui himna tura theihtawp an chhuah zel tur thu a tar lang bawk a ni.