Aizawl: April 15, 2023 zana Zonet-in zu zawrh thlawptute zingah kohhran rawngbawltute an tel nia a puan chu chiang lehzuala puang turin chief minister, MNF president ni bawk, Zoramthanga’n a phut.
Thawhtannia Mizo Hnam Rûn inkhawma thu a sawinaah Zoramthanga hian zu khapna dan, ‘The Mizoram Liquor Prohibition Act 2019’ Zonet-in an zirchiannaah ‘Zu zawrh thlawptute zingah sorkar hnathawk, kohhran rawngbawltu leh khawtlang hruaitu eng emaw zat an tel’ nia a puan chu mak a tih hle thu a sawi.
Zonet-in zu zawrh thlawpna lam thu chanchhinthar headline meuhah hmangin, zu zawrh leh a nih theihna tur lam hawiin a zir chiangtu tur an intir nia a lan thu sawiin Zoramthanga hian, “Zu chu zawrh a nih leh theihna tur goal-a khalh luh tumna ngar ngar leh hetiang hmalakna an rawn chhawpchhuak hi pawi ka ti,” a ti a, kohhran rawngbawltute sawi lan a ni chu pawi a tih thu a sawi.
MNF president chuan Zonet hian tute nge an contact tih engmah an sawi lang lo nia sawiin, “Excise department-a thawktu pakhat sawi dan tih te, mi thenkhat sawi dan tih te bakah, kohhran hruaitute zinga miin zu zawrh leh chu tha an ti, ni tein a puang a, hei hi MNF chuan kan ngai thutak hle a ni,” a ti.
Presbyterian, Baptist leh kohhran dang hruaituten zu zawrh leh hi tha an tih a rin loh thu sawiin, “Keini, MNF chuan zu zawrh leh hi tha kan ti lo a, zu zawrh chhunga dik lo tak leh dan pangngai lo taka thihna a thlen tamzia te kan hmu fiah tawh. Kan tawrhna kha rapthlak kan ti a, mihring nunna thap tur leh chhungkaw keh darhna thlen turin zu hi zawrh nawn leh chi-ah kan ruat lo,” a ti.
MNF chuan thuchhuah an siamah zu chungchangah hian an party-in dinna a nei sa tih tar langin, “Kohhran hruaitute pawh hian zu zawrh leh hi tha an ti lo a nih chuan chiang taka an sawi nawn leh hi a pawimawh hle a. Sorkar hnathawk, kohhran hruaitute leh khawtlang hruaitu ten zu zawrh chu tha ti zawk nia ngaih theih tura Zonet-in a puang hi tih chian a ngai hle a. Zu khapna dan, ‘The Mizoram Liquor Prohibition Act 2019’ hi Mizo mipui, kohhran hruaitute leh MNF party duh dan anga siam a ni, tih hi MNF chuan a sawi nawn duh a ni,” an ti.