US-A mihring dam chen (life expectancy) chu kum 2022 chhung khan a tlahniam nasa hle tih an sawi a, hei hi coronavirus hripui lengin na taka a nghawng vanga ngaih a ni.
Mihring damchen hi kum 77.8-ah a tla thla niin Centers for Disease Control chuan a sawi.
“Tlakhniamna nasa tak a ni,” tiin Dr Robert Anderson, CDC-a Chief of Mortality Statistics chuan Associated Press hnenah a hrilh.
Hnam bil hlawm lian zingah dam chen hi a tlahniam nasa zual hle.
Mihang mipate chu a inthlak nasa ber niin January leh June, 2020 inkar khan kum thum dawnin a tlahniam hman.
Hispanic an tih mipate pawh kum 2.4-in a tlahniam bawk.
“Hetiang zata dam hun chhung tlahniam nasa hi chu kum 1940 chhova Indopui II-na lai ang vel kha a ni,” tiin Dr Anderson chuan a sawi.
Tun dinhmunah hian American-te dam rei zawng chu kum 75.1 a ni ta a, kum 2019 aiin kum 1.2-in a tlem zawk a. Hmeichhia pawh kum 80.5 zel dang ang vel an ni a, hei pawh hi kum khat dawna tlahniam a ni.
CDC-in report a siamah hian dam rei zawng tlakhniam duai chhan lian ber chu coronavirus a nih thu tar lan a ni.
US-ah hian mi 4,90,000 chuang zet Covid-19 vangin an thi tawh a, khawvela thihpui an tam berna ram a ni.
Statistics-ah hian hripuiin US-a mihang leh hnam tlem zawkte a nghawng dan pawh tar lan a ni a. Hri avang hian mingo aiin mihang thi a let thum dawnin an tam zawk.
Nikuma Brookings Institution-in Covid-19 avanga thi an zirna an tihchhuahah pawh, “Kum bithliah hrang hrangah, mihangte hi a thite kum a inzat pût a, mingote erawh kum inkar inhlat tak takte an ni,” an lo ti tawh bawk.