Mapuia Memorial Mizoram Cricket League 2023 ni hnihnaah Gorkha Cricket Club an chak leh a, a zawnin match hnih an chak nghal.
MCL tan ni ah Gorkha CC hian team tha, 1st Division champion lai Ramhlun Venglai Cricket Club chu run 52 in an hneh.
A ni hnihnaah Luangmual Cricket Club nen inhmachhawn lehnghal in run 46 in hnehna an chang.
Sihhmui a Suaka Cricket Ground a inkhelah Gorkha CC tan RVL hnehna kawnga man of the match a thlan tawh Sahil Sharma bawk a che tha.
Mizoram age group player hian ball 35 hmachhawnin run 55 a siam a. Ball 41 atanga run 43 siamtu Gaurav Singh nen nghet taka dingin ball 70 atangin run 96 partnership an neih chu a pawimawh hle.
Over 20 chhungin wicket 9 hlohin run 154 an siam a. Luangmual bowler zingah Lalrinchhana leh Lallawmkima Khiangte ten wicket hnih ve ve an la.
Luangmual tan opener Jehu Anderson chuan ball 27 atangin run 44 a siam a. Captain G. Lalbiakvela pawhin run 30 siam mahse midangin an run tam an thawh thei lo. Over 20 chhungin run 108 bak an tlin lo.
Gorkha bowler Ajay Rai chuan over li vawmin wicket thum a la ve bawk.
Inkhel hmasa zawkah Kulikawn CC in wicket 8 in Zarkawt Lords an hneh a. KCC tan Vikash Kumar che tha hle in an chak chhan lian tak a ni.
Vikash-a’n ball 51 atang run 87 a siam a, a tawp thleng dingin Sahil Reza(28) leh C. Lalrinsanga (19) te nen over 16.3-ah an run siam mamawh zat 149 chu an tlin a, wicket hnih chiah an hloh.
Vuak thlang zawk Zarkawt Lords tan opener H. Lalbiakhlua chuan ball 23 lek atangin run 53 a siam a, bul a tan tha. Mahse a hnu lama mite an che tha tawk lova. Run 39 siam a an innings khartu R. Lalhlimpuia vangin over 20 chhungin run 148 an tlin thei a ni.
KCC bowler zingah Lalramnunsiama chuan wicket thum la in maiden over vawikhat a nei bawk.