Kremlin-in video a tihchhuahah chuan Putin-a hi hmun zawlah helicopter atanga a chhuk lai a lang a, a chhunzawmna awm lovin car atanga a chhuak leh sipai uniform hain chibai a lo buk laiin a chhunzawm a, sipai commander Col Gen Oleg Makarevich ni ngeia ngaih a ni.
Control room-a thu a sawi lai a lang leh a, Col Gen Makarevich leh Russia-a thlawhna sipai hotu, Col Gen Mikhail Teplinsky inkarah a thu.
Col Gen Teplinsky-a hi American military expert leh British intelligence lamin a nihna hlihsak a nih hnuah January atang khan ral hmatawngah dah leh tan niin an sawi.
Video tawp lamah hian Putin-a hian ‘kum zabi 19-na hun laia Russian Army-a defence minister chawimawina dawng hnem ber’ tia a sawi pakhat chu a lem hlan a ni bawk.
Kawng sira road sign lo langah chuan ‘Kherson region-ah kan inhmu leh dawn nia’ tih a awm a, hei hi khualbuk bul mai niin he khualbuk hi heng laia awm a ni ngei tih hriat a ni a. Tuipui kam khawpuia heng lai vel bawr tho hi van sang atanga lak a lang bawk.
Putin-a’n Kherson a tlawh nia an sawina video hi Kremlin-in an tihchhuah a ni hlawm a, a tlawh tak tak ngei em tih erawh finfiahna a la awm rih lo.
Heng thil a lan hnuah hian Putin-a hi helicopter atanga a chhuk lai a lang leh a, hemi tum hi chuan thawmhnaw dang inbel tawhin bunker-ah hruai luh a ni a, Russian lei lam sipaia chief of staff, Col Gen Alexander Lapin nen an inkawm tih a lang.
Kremlin chuan Putin-a hian Vostok headquarters pawh a tlawh niin an sawi a, hei hi Russia-a National Guard hmunpui, an awp lai, Luhansk-a awm a ni.