Tunlaiin ram chhung hmun dang ang bawkin khaw lumin Mizoram a tuam mek a, khaw lum hian taksaah harsatna hrang hrang a thlen theih avangin taksate tidaia in uluk turin doctor ten mipui an chah.
The Zozam Times chuan khaw lumin mihring taksaa harsatna a thlen theih thila lo inven dan tur chungchangah Civil Hospital Aizawla Medicine Specialist Dr J Lalramchhuanga a kawm a, khaw lum hi naupang kum li hnuai lam te, kum upa lam, kum 65 chin chung lam leh natna benvawn neiten an tuar nasa bik thei niin a sawi.
Khaw lumin natna hrang hrang a thlen theih dan sawiin Dr Chhuanga chuan, “Taksa vung, thak, chawn tha chat, ke aikhirh, nikhawhrelova tluk, heat stroke te a thlen thei,” a ti a. Khaw lum lutuk avangin taksaa tui thate chu thlanah a chhuak nasa nia sawiin, hemi avang hian tuisik in tama ORS pawh in tam a tha hle tih a sawi.
Khaw lum vanglai chuan zing dar 10 atanga tlai dar 4 thleng in chhungah emaw, daihlimah emaw awm hram hram theih ni se duhthusam a nih thu Dr Chhuanga chuan a sawi a. Pawn lama hnathawk thinte pawhin ni sat vang lai chuan taksain a tawrh lutuk loh nan hahdam thei angin hna thawk thei se duhthusam a nih thu a sawi.
Ei leh in lama ei tur leh tih loh tur pawh sawiin, Dr Chhuanga chuan thil thlum lutuk ei leh in loh a that thu te, thil thak lutuk ei loh a that thu leh thau keng tam thei te ei loh a him thu te a sawi a. Thlai hring lam ei tam a that thu a sawi bakah zu in loh a him thu a sawi bawk.
Thawmhnaw hak tur pawh sawiin, “Cotton lam hak a tha a, thawmhnaw chu thawlin zang se, thli dawn luh theihna tur ni thei se a tha,” a ti.
Dr Chhuanga chuan khaw lum tawrh zawh loh avanga nikhawhrelova awmte enkawl dan pawh sawiin puan huha hruk te, tui vawta chiah te, vur tlanga an taksa deh te, zangthala muttir tur a nih thu te a sawi a. Hetianga harsatna tawk an awm chuan doctor pan vat thin a that thu a sawi bawk.