NBA champion lai Golden State Warriors chu Western Conference play-offs first round-ah 2-0 a hniam zawk ni turin Sacramento Kings in an hneh nawn.
West a seeded number 3 nihna hauhtu, team naupang leh hmabak nei eng a ngaih Kings hian best of seven series-ah vawi hnih hnehna an chang leh a nih chuan West semi-finals an lut dawn.
Warriors hi kum 2019 NBA Finals hnua a vawikhatna atan NBA Playoffs-ah a zawna an tlawm leh hmasak ber a ni.
He inkhelah hian Warriors forward Draymond Green chu hnawhchhuah a ni a. Domantas Sabonis nen ball an inchuhna lamah Sabonis awm ah hian a rap a. Flagrant 2 foul pek niin court a chhuahsan.
Green awm loh hnuah Kings hian inkhel tawp kharthat tumin an tang zual sawt a. Warriors in an pawtthla thei tawh lo.
Kings tan De’Aaron Fox leh Sabonis ten point 24 ve ve an score a. Lehlamah Warriors tan Steph Curry chuan point 28 leh assist vawi 6 a nei a. Klay Thompson chuan 21 a score a, forward tangkai Andrew Wiggins pawhin starting five-ah hmun chang leh tawhin point 22 a score bawk.
Game 3 hi Zirtawpni zingah Warriors court-ah an khel ve leh ang.
Inkhel dangah Eastern Conference Playoffs-ah Philadelphia 76ers in Brooklyn Nets chu 96-84 in an hneh.
Wells Fargo Centre-ah hian home team Philadelphia hi halftime hma deuhin point 10 a hniam zawk an ni a. Nimahsela third quarter-ah tho chhuak lehin Nets an lehthal.
Kumina East finals khel tura rin hlawh 76ers tan Tyrese Maxey chuan point 33 a score a. Tobias Harris leh Joel Embiid ten point 20 ve ve an thawh.