Tualchhung indona nasatna ram, Syria chuan May 26 hian president an thlang dawn tih Parliament speaker-in nimin khan a puang.
Indonain a tihbuai hnua president an thlan vawi hnihna tur a ni a. President ni lai, Bashar Al-Assad chuan thuneihna a neih chhunzawm beisei tho a ni.
Parliament Speaker Hamouda Sabbagh chuan ram danga Syrian awmte pawhin embassy-ah vote an thlak theih tur thu a sawi a. Inthlanna lo awm tura chuh tumte chuan vawiin atangin hming an pe thei dawn tih a thuchhuah a tar lang bawk.
Candidate-te chu tun hnai kum 10 chhung an rama awm an nih a ngai a, hei hi eptu hruaitu, ram danga hnawh chhuahten an chuh theih lohna tura tih a ni.
Parliament-a member 35 nei chin an ni tur tih a ni bawk a, Assad-a party-in an awh hneh leh hle bawk.
Kum 2000-a a pa, Hafez a thih hnua a thuneihna keng zui ta, Assad-a hi he inthlanah hian a din tur thu mumal taka puan a la ni lo.
Tualchhung indona a chhuah atanga a kum thumnaa inthlan, kum 2014-a an neihah vote tla zinga 88% hmuin thlan tlin a lo ni tawh.
Kum 2012-a an ram danpui siamah president-in term hnih chhung ro an rel thei ang tih a ni a, term khat hi kum sarih zel a ni.
Kum 10 chuang ‘civil war’ an lo neih tawh avang hian mi 3,88,000-in nunna an chan tawh a, ramchhunga mipui cheng chanve vel lai chu an khawsakna hmun atangin an awmdarh phah nghe nghe.