Afghanistan khawchhak lama Nangarhar province-ah chhungkaw pakhata mi pariat chu tute nge an nih hriat lohten mosque-ah kapin an that.
He thil hi Inrinni zana Jalalabad khawpuia thleng a ni a. Nangarhar Governor Ziaulhaq Amarkhil chuan he thil hi ram inchauhna boruak avanga thleng niin a sawi.
Thite hi unau mipa vek panga leh an unau dang (cousin) pathum an ni.
“Inkahna hi Ramadan hun laia tawngtai hun siam belh, tarawih laia thleng a ni a. Tum nei saa inbeihna niin ram inchuhna thil kal zel avanga thleng nia hriat a ni,” tiin Amarkhil chuan Al Jazeera hnenah a sawi.
Afghanistan-ah ram inchuh avanga intihbuaina hi a tam hle a. Thisen pawh a luan phah nasa a, thlah kal zela inhuat zuia kum tam tak chhung chhungkaw inhuat zuina pawh a thleng thin.
Nikum April thla pawh khan Nangarhar province-ah tho hian ram inchuhna avangin intihbuainaah tribal mi paruk thiin mi 20 dawnin hliam an tuar bawk a. Hemi tuma an inbeihna hi ni eng emaw zat chhung a thleng nghe nghe.