Indian hmeichhe zinga tlang lawn lama hmingthang ber pawl, kum 27 mi, Baljeet Kaur-i chu Mt Annapurna Camp IV bula a chhuk zawka a kal laia bo chu damin hmuh leh a ni.
Thlawhna atanga zawngtuten Kaur-i hi oxygen tel lova khawvela tlang sang ber 10-na a lawn haw lam, Camp IV chung lamah a chin hriat loh a ni tih Pioneer Adventure Chairman Pasang Sherpa chuan a sawi tih Himalayan Times chanchinbuin a tar lang.
“Thlawhna hmanga camp sang ber chhak atanga lak chhuah dan tur dap mek a ni,” a ti.
Kaur-ihi Camp IV lam pana amaha a chhuk lai chu aerial search team chuan an hmu tih Sherpa chuan a sawi.
Indian nula hi a chhip a thlen hnuah amahin a chhuk a, Thawhlehni zing thleng khan radio hmanga biakpawh theih a ni lo.
Thlawhna atanga zawngtute hian a bo tih hi Thawhlehni tuka radio signal hmanga ‘puih thuai a ngai’ tih a thawn an hmuh hnuah chauh a awmna lai hi an hre chhuak thei a ni.
Sherpa chuan a GPS location atanga a lan dan chuan metre 7,375-a sangah a awm tih a sawi a. Mt Annapurna hi Sherpa guide pahnih nen Thawhtanni tlai dar 5:15-ah an lawn tan a, helicopter pathum velin an hnu an chhui zui a ni.
Himachal Pradesh mi, Kaur-i hian nikum May thla khan Mt Lhotse lawn chhuakin Indian tlang lawn mi zinga seson khata metre 8,000 chuanga sang pali lawn thei hmasa ber a ni.
Thawhtanniah vek khan Kishangarh, Rajasthan-a cheng, Anurag Malu chu Mt. Annapurna Camp III pana a chhuk lam a bo bawk.
A hnuah Malu-a hi metre 6,000-a sang atanga tlain a thi tih hriat a ni.
Seven Summit Treks Chairman Mingma Sherpa chuan Ireland atanga thlasik laia K2 lawn chhuak hmasa ber nih tum, Noel Hanna chu Camp IV-ah Thawhtanni zan khan a thi bawk tih a sawi a. A ruang hi base camp-a lak tumin an buaipui mek.
Annapurna hi tlang sang 10-na niin metre 8,091-a sang a ni a. Lawn harsa leh hlauhawm ber pawla ngaih a ni.