Russian President Vladimir Putin chuan Ukraine-a an awpsak, Kherson region a tlawh.
Kremlin chuan sipai hotute thutkhawmpuiin commander-te hnen atangin report a ngaithla niin a puang.
Putin-a hian Luhansk region pawh a tlawh dawn nia ngaih a ni a. Russia hian Kherson leh Luhansk hi nikum atang khan a thuhnuaiah a dah tan a ni.
Russian hruaitu hi tun tum anga a zin chhuah hi a nei tam lo hle a, March thla khan Mariupol khawpui erawh a tlawh thut.
Ukrainian President Volodymyr Zelensky-a advisor, Mykhailo Podolyak chuan Putin-a hian ‘Ukraine an luah leh an tihchhiat hmunte a tlawh’ tiin Twitter-ah a tar lang a, ‘a tawp nan a pawikhawihna hnuhma en turin a kal’ niin a sawi bawk.
Putin-a thupuangtu, Dmitry Peskov-a chuan April 17-a a tlawh kha niin a sawi a. Hetih lai hian Kremlin website-in thlalak leh video an tihchhuah nen a inmil chiah lo thung.
Video clip pakhatah chuan Putin-a hian chiang takin Easter chawlh ‘a thleng tep’ a ti lai a lang a. Orthodox Easter hi Russia-ah chuan April 16-a an hman thin a ni a, Peskov-a’n a tlawh ni a sawi hma chiah a ni.
A hnuah Kremlin website-a video dah chu siam that leh niin Putin-a thu sawia ‘lo thleng tur’ a tih chu paih a ni.
President hian Russia-in an ram china a chhal, Zaporizhzhia region dinhmun pawh a ngaihven tih a lang bawk.
Sipai hotute nena Kherson-a an inkawmnaah hian an hna chu ngaihthah lo turin a chah a, “Ka tana pawimawh chu hmasawn zelna dinhmuna in ngaihdan hriat te, nangni ngaihthlak leh thil hriat inhrilh te a ni,” a ti.
Russian sipaite hian nikum khan Kherson khawpui an lo chhuahsan tawh a, Februarym 2022 atanga Moscow-in Ukraine a rûn hnua region khawpui a lak awm chhun hi an luah tawh lo.
Hetih rual hian region chhunga hmun eng emaw zat chu Russian-te hian an la thunun.
Khemlin chuan president hi Russian Defence Minister Sergei Shoigu leh Chief of the General Staff Valery Gerasimov ten an tawiawm lo niin a puang a, hetianga an ram commander lawk pathum a ruala hmun khatah, ral rama zin chhuah rual chu ‘a risk a sang lutuk’ niin a sawi.