- Dr. C. Lalrampana
He khawvela hringnun lo chawr chhuah chinah Rimawi (music) hian hringnun a luah hneh hle a ni tih a hriat theih. Khawvel hmun hrang hranga mihring chung hmasate chanchin atanga thlirin rimawi an ngainatzia leh an nitin nunah hmun pawimawh tak a luah thinzia a hriat theih bawk. Tun lai angin rimawi tum chi leh hmanrua chihhrang hrang (Musical instrument) tha nei pha lo mah se, an phak tawk ang zelin hmanraw chihrang hrang hmangin rimawi chihrang hrang an siam ve thin tih a hriat theih. Mizote pawh hnam naupang te ni mah ila kan phak tawkah rimawi chihrang hrang hrang heng darbu, darkhuang, lemlawi, ukulele, mau tingtang, darbenthek, phenglawng, mau tawtawrawt, hnahchang tum hmangin rimawi (music) chihrang hrang an siam chhuak thin a ni tih kan hre tlangpui awm e.
Hetiang zel hian rimawi chihrang hrang bakah a seh hmeh tur hla pawh tun lai hla nalh tak tak angte hi phuah thiam pha lo mah se; an phak tawkah hnamtinin hla leh rimawi engemaw tal an nei theuh thin. Mizote pawhin hla kan ngaina hle a, kan hla neih hmasak ber pawh-“Khawmhma pal a er an ti, a duh duhin er rawh se” tih a ni a, a thluk erawh enganga nalh nge tih kan hre lem loh a ni mai thei. A thu ho hle mah se, a hun lai kha chuan mittui tla zawih zawihin an sak ve thin ngei a rinawm. Mithiamte’n “Tht hi hla a ni a, hla hi thu a ni” an lo timathlawn lovin thu tha tak leh awmze ril tak neite hi a thluk (tune/tone) chihrang hranga an siam hnuah an han sa a, hla a lo ni ta mai thin a ni. Hetih lai hian a thu awm chuang si lo, rimawi kithlak hrang hrang hmanga tum rik atangin rimawi tum thiamte’n mipui an awi bawk thin. Heng atangte hian hla leh rimawite hian hringnun an luah hnehzia chu a hriat theih awm e.
Kan thupui ang khian rimawi hi a hlu êm êm a, mahse, awmze nei lova a rik chuan ninawm tak a ni thung. Awmze nei taka a rik erawh chuan damdawi thatak, lunglen hnêmtu, indona hmanrua, hmangaihna hrui thlungtu leh Pathian fak leh chawimawina te, inpumkhatna hmanrua leh duhthusam thlentu hmanraw tangkai tak a ni thung. Rimawi hi zai rem nan chauh ni lovin Dam lo enkawl nan thleng hian dandawi tha tak a ni tih kan ngaihtuah ngai lo mai thei. Chuvangin, rimawi hmanga inenkawlna (melotherapy) chungchang mithiamte’n an ngaihdan leh hmuh dan hi i han chhuichiang dawn teh ang.
A AWMZIA : Melotherapy hi mihring thluak, ngaihtuhna fumfe nei tha thei lote leh rilru buaite chetziate rimawi (music) leh ri (sound) chihrang hrang hmanga enkawlna hi a ni. Mithiam rualte’n kum tam tak taima taka an beih hnua an hmuh chhuah danin tun lai psychiatrics enkawlna atanga thlirin melotherapy hi nervous disorders enkawl dam nan a tangkai hle a; Music technology hmanga dam lo enkawl hi hriatna thazam (nerve) tha lo te, thluak (Brain) lama harsatna neite mihring pangngai dinhmun an luah leh theih nan rimawi damdawi (melotherapy) hi a tangkai hle a ni.
Mihring nungchang, chetzia chhuitu (psychologist)-te leh Zirna Sikul lama zirtirtute’n hetiang lama enkawl mamawh zualte chu rimawi chihrang hrang hmangin an enkawl thin. Heng electronic rimawi chihrang hrang hmanga music hmanrua tha tak tak siamte hi damlo, a bik takin rilru hah, rilru buai, ngaihtuahna mumal nei thei lo leh hriatna thazam (nerve) tha lote enkawl nan a tangkai hle niin mithiamte chuan an hmu chhuak a ni.
Sawifiahna: Rimawi damdawi hi hriselna leh dam rei nana ruahman a ni a; Rimawi chihrang hrangte hi kum bithliah bik awm lovin tute tan pawh damdawi atana hman theih vek a ni. Rimawi hian rilru awmdan chhuina (psychology), rilrua veina leh phawklekna (emotional), hriatpuinaa thiltih (cognitive) leh vantlang leh mimal mamawh phurhukna atantea hmanraw tangkai leh belhfakawm tak a ni tiin Australian Music Therapy Association Inc. chuan a tarlang nghe nghe a ni. AMTAI-in a ngaihdan chuan rimawi hmanga damlo enkawltu tur chu rimawi tum thiam tak (proficient musician) a ni ngei turah a ngai.
A TANGKAINA: Rimawi hian damlo enkawlna kawngah kawng hrang hrangin tangkaina a nei a, a tangkai dan hrang hrangte kan chhui chian a pawimawh hle. Amaherawhchu, I Korinth 13:1ff-in a tarlan anga dar ri mai mai emaw, darbenthek ri mai mai emaw anga awmze nei lova rimawi hi tum rik a nih chuan dam tha, hrisel pangngai tan pawh a ninawm a, ngaihtuahna a tibuai a; lung lam thatlohna thleng a thlen thei thin, dam lo tan phei chuan nat zualna thlentu a ni hlauh thei a ni. Amherawhchu, rimawi chihrang hrangte hi damdawi pangngai (conventional medicine) ang bawkin dam lo enkawl nan, tihdam nan leh nachhawk nan a tangkai a; chuvangin, mithiamte hman tangkai dan tlem I han tarlang teh ang.
- Lung (Heart) siam thatu a ni thei: Rimawi hian lung, lairil, laimu, hnukpui thil pawimawh ber lai a siamtha thei a; Hman lai atang tawhin an lo hmang tangkai hle tawh thin nia chhut a ni. Chhia leh tha hriatna thiang (conscience) puitu tha tak a ni a, lungphu phut dan dik theihna tur leh thisen kal vel (blood circulation/pressure) siamthatu a ni thei bawk. Hei bakah hian chakna (energy), beiseina avanga phurna (optimism) leh mahni inrintawkna (self-confidence) thlengin mi a neihtir thei bawk.
- Thinrimna leh thinchhiatna tirehtu a ni: Zaithiam zai, hla chham mi, rimawi tum leh a taka zai (Live music) ngaihthlak leh rimawi tum laite dam lovin a hmuh emaw, a ngaihthlak thin chuan a natna avanga thinramna, thinchhiatna leh lungngaihna a tawh lai mek chu a sutkiansak thei thin a ni. Chuvangin, mithiamte chuan rimawi hmanga inenkawlna (melotherapy) hi an hmang tangkaiin an ngai thutak hle.
- Mi chawhbuai leh thin thawh thutna tirehtu a ni: Thinbutut neih avanga mi chawhbuai leh thinthawk phut leh thin alh phut avanga buaina siam ching leh harsatna siam chingte leh thluak lam hliam, tihkhawloh leh atphah theih (traumatic Amnesia) lakah rimawi damdawi hian damlo chu a chhan chhuakin a venghim thei a ni tiin mithiamte chuan an chhut a ni.
- Rilru put hmang (mood) thlakdanglam theitu a ni: Rimawi hian mihringah phurna leh hlimna nasa tak a thlen thei a; chuvangin, dam lo ngui leh chau tak paw’n ngaihtuahna fim a la hman theih tek tek chhung chuan a rilru put hmang (mood) a thlakdanglamsak thei a, a ngui leh chauh êm êmna (moody) pawh tidanglamin, a lungngaihna tanpuitu leh tiharh thar (refresh/revive) theitu a ni. Chuvangin, damlo chuan a duhzawng leh ngainat zawng rimawi, a tawktein ngaithla thin se a dam chak phah theia ngaih a ni.
5.Hriatna leh thiamna (Skill) chawmtu damdawi tha a ni: Naupangtein hlachang khat lek pawh awmze nei tak leh dik taka a chhamchhuah emaw, a sak emawte hian nu leh pa rilruah phurna a thlen thei a. natna khuma an mut lai pawhin chu chuan damna thlenin a hriatna leh thiamna (skill) a pui thei thin. Chutiang zelin naupangin hlachang tawite te a sak emaw, a ziah chhuah hian a thiamna leh finna (skill) a belhchhah thin a ni. Tleirawl cancer natna vei, dam chhuak tawh lo tura inngai tan phei chuan a damchhung zinkawnga hlimna thlentu damdawi tha ber chu hla leh rimawi a ni tiin mithiamte chuan an ngai nghet tlat a ni.
- Ruh leh thling/tuihnang lama tanpuitu: Ruhna, ruh tliak leh thling thlak ngai (bone marrow transplant) hmun fianriala dah hran damlote tan rimawi damdawi hi a tangkai hle niin chhut a ni. Rimawi chuan thling leh ruh leh vun kara tuihnangte chu nasa takin a tanpui thin nia ngaih a ni bawk. Chuvangin, hetianga enkawl lai damlote tan hian a bikin rimawi leh zai chihrang hrangte an hmang tangkai thin a ni.
- Damlo tan damdawi ina awmnawmna (ease adjustment) a thlen thei: Damlo tute tan pawh rimawi leh zai rimawi tak takte hi damdawi ina awm tinuamtu leh tihahdamtu, tithlimtu leh beiseina thar thlentu hmanraw tha tak a tling thei. Chuvangin, rimawi damdawi hi hman tangkai a pawimawh hle a; hman hun leh hmun erawh thliar thiam a ngai thin tih hriat a pawimawh hle thung a ni.
- Hlauhna leh zamna, lunngaihna sukiangtu a ni: Damlovin hlauhna, zamna, lunngaihna leh manganna leh hrehawmna (distress) a neih te, thinrimna leh tawt up upna a neihte hian rimawi damdawi hian a chhawk zangkhai thei thin. Chuvangin, hetianga damlovin hlauhna leh lungngaihna a tawrh chuan rimawi leh zai hmanga chhawk hahdam dan ngaihtuah thin tur a ni.
Khing kan tarlan bak pawh khi damlo enkawl nana rimawi chihrang hrang tangkaizia leh thatzia sawi tur tam tak a la awm thei. Kan sawi seng rih lovang. Engpawhnise, rimawi thatzia leh pawimawhzia chu mitinte hian kan hre theuh awm e. Nula tlangval inngaizawng tan inlem nan te, lusun khawhar hnemtu atan te, hnam inpumkhatna thlentu atan te, mithiam leh hmingthang chawimawi nan te, thil chihrang hrang inhriattirna tura awmze nei taka hman atante a tangkai hle. Ni chhuah rual leh tlak ruala Sipai tawtawrawt tum rite leh indo laia ralkhelh dar ri chiam thinte leh a dang tam tak sawi tur a awm thei awm e.
Kan naupan laia a tak ngeia thil thleng ka la hriat reng chu; kan veng tlangval pakhat hian a lo vahnaah a kut zungchal a sat chhum hmawk mai a; tun lai anga damdawi in awm hnai ni ve hek lo, tuam zawma tha thei mai ni bawk hek suh. A nihna ang ang leh a awm dan ang angin a tuar ngawt ngawt mai a; nachhawkna chak chi inchiuna emaw a mum (tablet) emaw pawh hmuh tur awm si lo le! A hangin a tuar tlawk tlawk mai a, a hliam na tilutuk chu zan laiah chuan a faifuk hlerh hlerh mai a; a faifuk chhan an han zawh chuan-“A na lutuk a, damdawi a awm bawk si lova; chuvangin, faifukin ka na ka chhawk a, ka zai veng veng ta ringawt mai a ni. Tin, khatia ka faifuk khan a na zualpui a reh phahin ka hre ve tlat bawk.” a ti a, a sawi lai khan tuman awi chanin an chang lo hrim hrim a; an nuihzat vel mai mai zawk a ni. Mahse, kha thil thleng kha tun hnua ka ngaihtuah let hian thil ni thei a lo ni dawn hle a ni tih mithiamte’n rimawi damdawia inenkawlna (music therapy/melotherapy) an hmuh chhuah leh hman mek dan atangte hian a chiang hle niin a hriat theih.
Tin, rimawi leh zaite hi damlo tan leh dam hrisel tha tan pawh a tangkai takzet a; mihring tungchhova kal tawh phawt leh ransa leh ramsa nungcha tinrengte leh thing leh maurua, he khawvela Pathian thilsiam tinrengte hian rimawi hi an ngainain an mamawh êm êm vek a ni tih kan hriat thiam a pawimawh hle. Nausen pianghlimte pawh hian thanlen nan rimawi an mamawh a, muttui nan, nau awihmut nante leh an tap thlem nante thlengin a pawimawhin a tangkai takzet a ni. A bik takin Kristian tan leh kristian lo tan pawh kan sakhuana atan rimawi hi a pawimawh tawpkhawk a, rimawi tel lo chuan tu sakhua mah hi a famkim thei lo. Ringtu Pathian nung betu tan phei chuan tingtang rithum mi te, ri fiak mi te, sakbut te, phenglawng te, keyboard, harmonium, banjo. Guitar, Khuang darbenthek etc. chihrang hrangte hi an va hluin an va pawimawh em! Dam lo enkawl nan lah a tha bawk si. Pangpar huan (TNT camp)-a an pangpar enkawl mekte leh mi pangngai pha lote dahna leh enkawlna in/hmun chihrang hranga pangpar enkawl mekte pawh hi rimawi hian an kimlohna lai a phurhruk nasa hle a ni tih kan ngaihtuah ngai em le? Chuvangin, in lama damlo enkawl mektute leh damdawi in hrang hranga kan nurse rual leh daktawr fel tak takte hian an damlo enkawlte mamawh ngaihtuahin rimawi damdawi (melotherapy) hi hman tangkai tum ve ta se a lawmawm ngawt ang. Amaherawhchu, a bengchheng uchuak zawng leh damlo nazualte tana ninawm zawng leh awmze nei lo rimawi emaw rimawi lem lo bengchheng erawh thliar thiam se a tha hle bawk ang.