Atalanta leh Fiorentina te 1-1 in Thawhtanni zanah an inhnehtawk a. Bergamo khaw club hian a sang pali zinga tel tuma an beihna kawngah point an hloh.
Parukna a awm mek Atalanta hian top four an inchuhpui team dangten tun kartawpa point an hloh chu remchangah an la thei lo. Stadio Artemio Franchi-ah goal khung hmasa zawk nimahsela an hmahruaina an hum tluan lo.
Halftime hma deuhin midfielder Joakim Maehle chuan goal mawi a khung a. Penalty area chhungah ball tha taka lalutin keeper Pietro Terracciano ban phak lohah a pet lut.
Second half tan atanga minute 11 a kal lehin Atalanta in penalty an chawi a. An defender Rafael Toloi handball chu VAR hmanga enfiah a nih hnuah penalty chawitir niin Arthur Cabral chuan Fiorentina tan a khung.
Second half-ah La Viola in goal khung teuh tum hnih an nei a, Cristiano Biraghi freekick chuan goal ban a fuh a, Giacomo Bonaventura goal khung tur Atalanta goalkeeper Marco Sportiello chuan a dang bawk.
Atalanta coach Gian Piero Gasperini chuan, “Point khat kan sual chhuah avangin player-te an fakawm. Chutihrualin AS Roma nena kan inkhelh turah kan tan chak loh a thiang lo.” tiin inkhel zawhah a sawi.