Arunachal Pradesh Chief Minister Pema Khandu chuan sorkar hna thawk leh police-te chu ruihhlo an tih leh tih loh inendik (toxicology test) vek turin a ti.
Chief minister chuan Arunachal Pradesh sorkar hna thawk zingah ruihhlova inhnamhnawih an awm tih sawi a awm thin tih sawiin, an tih leh tih loh finfiahna ti vek turin a ti.
Khandu chuan ruihhlo nena inhnimhnai reng chu vantlang tana hna thawk turin an tling lo va, an rintlak tawk lo niin a sawi.
“Arunachal Pradesh-a sorkar hna thawk leh police zawng zawngte ruihhlo an tih leh tih loh inendik turin ka ngen a. Mipui rawngbawltu zingah ruihhlo nena inhnamhnawih an tel hi kan buaina a ni tawh tur a ni lo. Kum 2022-ah chuan Drug-Free State kan ni tawh ang,” tiin Khandu chuan Twitter-ah a tar lang.
Arunachal Pradesh sorkar hian sorkar hnathawkte hi ruihhlo hluar zualna district pariatah chuan toxicology test a lo ti tawh.
Namsai, Lohit, Dibang Valley, Upper Siang, Anjaw, Changlang, Tirap leh West Kameng te hi India rama ruihhlo ti an tam zualna district 272 zinga tel an ni.
State sorkar hian a hna thawk zingah ruihhlo ti leh he lama inhnamhnawih reng reng lakah khauh leh na takin an chungah hma a la zel thin a ni.