Western Conference a NBA Finals khel tura rinkai Phoenix Suns chuan an inkhelh hmasak zawkah Los Angeles Clippers hneh lo mahse first round series-ah game khat la let ve turin 123-109 in Nilaini zingah an hneh.
Suns hian Footprint Center-ah Clippers hi an mikhual a. Game 1-ah inkhel tawp dawn lama Russell Westbrook chetthat avanga chesual Suns in tlawm nawn an tum tawh lo.
An All-Star Devin Booker chu an chak chhan lian tak a ni a. Point 38 score in assist vawi 9 a nei a. Point 13 laiin second quarter-ah hniam zawk hman mahse an lehthal thei a ni.
Booker chuan, “Playoffs inkhelah hi chuan chak tura engpawh tih inhuam a ngai. Tunah vawikhat kan chak tawh a, LA-ah chak kan tum leh dawn.” tiin inkhel zawhah a sawi.
Suns tan Kevin Durant chuan point 25 a score bawk a. Lehlamah Clippers tan Kawhi Leonard leh Westbrook ten point 31 leh 28 an score ve bawk.
Eastern Conference lamah team naupang leh hmabak nei eng taka ngaih Cleveland Cavaliers in 107-90 in New York Knicks an hneh a. Anni pawh 1-1 in series-ah an intluk mek.
Cavaliers tan Darius Garland chuan point 32 leh assist vawi 7 a nei a. Caris LeVert chuan point 24 bench atangin a thawh.
East a champion tura rin hlawh tak Boston Celtics in 119-106 in Atlanta Hawks an hneh a, 2-0 in series-ah hma an hruai ve thung.