Aizawl: District Jail, Lunglei tang mi pangate chu nimin zing dar 2 vel khan an tlan chhuak. Police-ten ngawrh takin an chhui zui mek.
Tang tlan chhuak – Lalchawimawia (24), Thangte khua, Lunglei district hi September 6, 2021 tlaia Lunglei Chanmari BCM biak in kawta sumo counter nghaktu, K.Vanlalduati rawng taka thattu a puh, IPC 302 a charge a ni a. Lalbawihliana (27), Zokhawthar; Dokapthang (26), Zokhawthar; Haudeihchhin (25), Tlangnuam, Champhai district leh Vanneihthanga (38), Leisen Myanmar te hi ruihhlo vang man niin Lunglei Excise hnuaia NDPS thubuai nei lai te an ni.
Lunglei atanga thu dawn danin nimin zing dar 1:30 khan jail warder duty-in ward a tlawh kual laiin engmah thil fel lo hmu loin, zing dar 2:30 vela a tlawh leh chuan mi pangate hi an tlan chhuak tih a hria a, Lunglei Police Station hriattir nghal an ni a. Nimin zing dar 4 khan District Jail Superintendent hian FIR a theh lut nghal.
Nimin chawhma lam khan Lunglei SP leh SDPO te chuan jail hi tlawh nghalin thil thlen dan an enfiah a. Tang tlan chhuakte man tur hian ruahmanna hrang hrang siamin chak takin hma an la zui nghal a ni.
Tang tlan chhuakte hi convict ward tia an sawi leh Ward No. II-a awmte niin, he ward-ah hian mi 60 vel an awm a, tlan chhuak tate hian bual in bang brick rem chu mihring leng vela tichhiain ward hi an chhuahsan a, heta tang hian jail hungna barbed wire thuah hnih chu an lawn liam leh a ni.
Tlan chhuak mi pangate hi hmun hnihah inthenin jail hungna hi chhuah lamah leh tlak lamah an lawn liam nia an hriat thu leh an lawn liamna ni ngeia ngaih hmun hniha jail hungna pawn lamah slipper bun khat ve ve an hmuh thu sawi a ni bawk.
Thudawn danin District Jail, Lunglei hi mi 109 tan theihna tura ruahman a nih laiin, nimin chawhnu lam thleng khan mi 151 awmin 16 chu hmeichhia an ni.
District Jail, Lunglei-ah hian thawktu jail warden mipa 12 leh hmeichhia pariat awmin office staff 10 an awm a, a hungna pawn lam ft 30 vela sangah duty post pasarih awm bawkin, heta duty tur hi home guard pathum an awm bawk.
Jail-ah hian thawktu indaih lohna avangin jail tang zinga mi thenkhatte duty-tir thin nia sawi a ni a, nikum pawh khan ambulance tih loh lirthei dang pakhat mah an nei lo a, ambulance khalhtu tur driver an nei lo bawk a, tang zingah dam lo, damdawi in panpui ngai an awmin a buaithlak thin thu sawi a lo ni tawh bawk.