Khawchin zirtuten India ram chu khaw lum leh ni sa takin a tuam zui deuh dawn tih an sawi mek laiin a lum hle mek zel a. Thawhlehni khan Uttar Pradesh-a Hamirpur leh Prayagraj-ah chuan 44.2°C zet a ni.
Delhi-a lum leh vawt tehna rinpui ber, Safdarjung Observatory chuan 40.4°C nia chhinchhiahin a nih dan thin pangngai aiin 4°C velin a lum zawk a. Ni li chhung a zawnin 40°C chung lam a ni tawh.
Pusa-ah pawh 41.9°C leh Pitampura-ah 41.9°C a ni bawk.
Ram khawpui berah hian Nilaini chawhnu atanga chhum leh ruah tlem thawk turin India Meteorological Department (IMD) chuan a sawi lawk thung.
IMD hian khawthlang lam atanga ruahtui pai chhum tlehin Himalayan region khawthlang lam, India hmarthlang phaiah ruah tlem a surtir dawn thu an sawi lawk.
Thla tirah khan MeT office hian India-ah hian April leh June inkarah hmarthlang leh khawthlang lam tih loh chu kum dang aia a lum tur thu an lo sawi lawk tawh bawk.
Hetih hun chhung hian ram pum deuhthawah, a bikin ram laili, khawchhak leh hmarthlangah a nih dan pangngai aia lum a ni dawn niin an sawi.
Meteorological department hian Thawhlehni leh Nilaini atan khan Bihar-a Patna, Banka, Jamui, Nawada, Aurangabad, Supaul leh district thenkhatah khaw lum tur sawi lawkin ‘orange’ alert a pe.
Bihar-ah vek hian Begusarai, Nalanda, Gaya, Arwal, Bhojpur, Rohtas, Buxar, Khagaria leh Munger region-ah te ‘yellow’ a pe bawk.
Meteorological department hian rawng chi liin hriattirna hi a chhuah thin a. Green (chet lai ngai lo), yellow (ngaihven ngai), orange (inralrin ngai) leh red (chet chhuah ngai) te a ni a. “Mipuite chu ni sa em nasat loh tur leh tui tlachhama awm theih laka inveng tura tih an ni,” tiin Bihar Disaster Management Department hotu chuan a sawi.
West Bengal-ah pawh Bankura-ah chuan 43.7°C a ni a, khawpui ber, Kolkata-ah 40°C a ni bawk.
Khaw lum hi Haryana leh Punjab-ah pawh a la kal zel dawn a, state pahniha hmun tam zawkah chuan 40°C chung lam a ni thei dawn a. Haryana-ah hian Hisar chu a lum zualna niin 41.4°C a tling tih meteorological department chuan a sawi.
Karnal-ah pawh 40.7°C a ni a. Ambala (39.7°C), Narnaul (40.2°C) leh Bhiwani (39.6°C) a lum bawk.
Punjab-a Bathinda-ah chuan 41°C a ni a, Amritsar-ah erawh 36.6°C niin Patiala chu 41.2°C a ni a. State pahnihin khawpuia an intawm, Chandigarh pawh 39.4°C a tling.
Uttar Pradesh-a Prayagraj leh Hamirpur chu India-a a lumna lai ber niin 44.2°C a tling tih weather department chuan an sawi a, state khawthlang leh hmun thenkhatah ruah a hnai tih an sawi thung a. Lucknow-ah 41.3°C a ni bawk a.
Thlaler awmna, Rajasthan-ah pawh a lum hle a, Chittorgarh-ah chuan 43.2°C tlingin Kota (42.8°C), Banswara (42.7°C), Phalodi (42.2°C), Dholpur (42°C), Alwar leh Sawai Madhopur (41.7°C), Tonk (41.6°C), Churu leh Pilani (41.4°C), Barmer (41.2°C) leh Jaipur (40°C) a ni bawk.
Hetih lai hian MeT chuan Nilaini leh Ninganiah Jodhpur, Bikaner, Jaipur, Ajmer leh Bharatpur velah ruah a sur an ring thung.
Ni hnih thum vel hnu atang chuan khaw lum lam pawh 2-3°C vela a tlakhniam an beisei.
Ni sa tak an tawrh hnuah Himachal Pradesh tlangram hnuaia awmte chuan ruah tlem dawngin boruak a daih phah deuh.
Una-ah chuan 37.4°C a nih laiin heng lai vela a lumna ber, Dhaulakuan-ah 38.7°C a ni bawk.
Khualzinte tlawh thin – Shimla, Manali, Dharamsala leh Narkanda-ah chuan 25.4, 21, 28.2 leh 19.2°C a ni hlawm bawk.
Andhra Pradesh State Disaster Management Authority (APSDMA) chuan khaw lum hi mandal 117 velah a la chhunzawm dawn tih an sawi.
“Alluri Sitarama Raju district-a mandal pasarih, Anakapalli-ah 16, East Godavari-ah pali, Eluru, Palnadu, Visakhapatnam leh Nandyala-ah pahnih theuh, Gunturu-ah paruk leh Krishna-a 10-ah a la nasa dawn,” an ti.
Mandal 117 zingah hian Alluri Sitarama Raju district-a Chintur leh Nellipaka-ah chuan 44.7 leh 44°C a ni thei dawn tih an sawi lawk bawk.
Hetih lai hian Kashmir hmun sangah chuan vur a la tla ve thung a, phaizawlah pawh ruah a sur bawk tih thuneituten an sawi.
Line of Control (LoC) bula Machil-ah chuan vur hi inches thum vel a tla.
Phaizawla awm, Srinagar khawpuiah pawh Thawhlehni zan zankhuain ruah a sur a, khua pawh a tivawt hle.
Weather office hian ruah hi ni hnih vel tlem a la sur chhunzawm an ring bawk.
Khua a hnawn mek lai hian ruahpuivanawn leh darkar khata km 20-30 vela chak thli pawh Jammu & Kashmir hmun thenkhatah a thawk thei.
Hetih lai hian ‘Maharashtra Bhushan’ award semna, Navi Mumbai-a neiha ni sa lutuk avanga thi chu mi 14 an tling tawh a, enkawl lai mi pasarih an la awm mek bawk tih thuneiten an sawi a ni.