Sudan khawpui, Khartoum-ah chuan an rama Thawhlehni tlaidar 6:00 (India-a zan dar 9:30) atang khan inkahhai puan ni mah se inbeihna a la awm zui reng.
Khawpui laili, a bul hnai lawka mihring chenna awm, army headquarters leh thlawhna tumhmun bulah inbeihna a la awm nasa.
Inbeih mek sipai general pahnihte chuan mipuiin damdawi thila an mamawh leh ni tin mamawh dang an lam khawm theih nan darkar 24 chhung inkahhai an remti a ni.
Mipui hian tui leh ei tur an tlachham tan tawh.
Thawhlehni chawhma lam khan Khartoum-a cheng nu pakhat chuan inah tui in tur an neih tawh loh thu a sawi a, “Tukin khan kan zo,” a ti.
Duaa Tariq-i hian a fa kum hnih mi tana an dah hran tui um khat chauh an nei tawh a, a chhungte silaimu leng tawn palh hlauvin an ina corridor chep takah an inhnawh khawm thu a sawi.
“Mi tam tak an chenna inah silaimu leng tawng fuh leh missile-in a fuh avanga thi an awm a, in chhuahsan loh hi a him ber,” tiin hmeithai, Tariq-i chuan a sawi.
Inrinni atanga army leh Rapid Support Force (RSF) paramilitary group ten thuneihna inchuha an indonaah hian mi 200 dawn an thi tawh.
Inkahhai puan tan hma darkar chanve chauh a awm tawhah khan Khartoum-ah hian khawpui chhak lama cheng unau mipa pathum chu bomb avangin an thi.
Mi chengte hian Muslim Ramadan an hman meka chaw an nghei chu tlai dar 6:00-ah an titawp thin a, hetih lai pawh hian silai a ri nasa hle a. Khawpui hmar lam, Bahri-a chengte chuan an chungah thlawhna a thlawh thu an sawi.
Hmeichhe pakhat pawhin inkahhai puan tan a nih thlengin hmanraw lian tak taka inkah thawm a awm reng tih a sawi.
Darkar 24 chhunga inkahhai puan hian zawm a hlawh chuan mi chengte hian puihna an dawn theih a beiseiawm a, hetih lai hian Red Cross chuan an damdawi inte chu a derdepin mamawhtute pek tur an tlachham hle tih a sawi.
Tanpuitu pawl hian mihring maktaduai 10 vel chenna khawpuiah hian an ina tang mi tam takin puih an mamawh nia insawiin an ko nasa hle tih an sawi a, tam tak phei chuan electric an nei lo bawk.
Inbeihna hi Sudan ram chhung hmun dangah pawh a thleng a, khawthlang lama Darfur chu a nasa pawl a ni.
UN aid chief chuan mi tanpuitute beih a hlauhawm thu leh mipat hmeichhiatna kawngah pawh khawih an hlauhawm hle niin a sawi.
Sudan-ah hian an ram hruaitu (de facto leader) ni mek, Gen Abdel Fattah al-Burhan-a lamtang leh RSF hotu, a deputy ni bawk, Hemedti tia hriat lar, Mohamed Hamdan Dagalo chu thuneitu zawk nih inchuhin an inbei a ni.