Karnataka assembly inthlan lo awm tura an star campaigner tur an puan zingah Congress chuan Sachin Pilot an telh lo.
Eptu party-in star campaigner tur an tih zingah hian chief minister hlui, tun hnai lawka BJP atanga lut, Jagadish Shettar pawh a tel a. Hetih lai hian ualau taka Ashok Gehlot nena an inkara inmil lohna awm tilangtu, Pilot chu a tel ve lo a ni.
Rajasthan Chief Minister Gehlot-a telin Congress chief minister dang pahnih, Bhupesh Baghel (Chhattisgarh) leh Sukhwinder Singh Sukkhu (Himachal Pradesh) te chu star campaigner 40 zingah telh an ni bawk.
May 10-a inthlan lo awm turah hian Jan Sangh leh BJP-a kum tam tak lo tel tawh, Shettar-a hian saffron party-a candidate a chan loh avangin a chhuahsan a, Thawhtanni khan Congress a zawm.
Pilot-a hi kum 2018 Karnataka inthlanah khan star campaigner a ni a, tun tumah a tel ta lo va. Kum 45 mi hi tun hnai lawka Assam-a inthlanah pawh star campaigner zingah a la tel a ni.
Tun hnaiah Pilot-a hian an state-a a telna sorkar ngei chu a sawisel bakah hma a lak dan duhkhawp lohna a lantir a. Gehlot-a sorkar chu an hma chiaha BJP sorkar laia ei rukna awm chhui tha tawk lovah a puh a ni.
Shashi Tharoor pawh Gujarat inthlana star campaigner-a a tel loh hnuah Nagaland inthlanah a tel a, Karnataka-ah a tel zui leh dawn.
Congress President Mallikarjun Kharge, party chief hlui Sonia Gandhi, an hruaitu hlun zingah Rahul Gandhi, P Chidambaram, Jairam Ramesh leh Priyanka Gandhi Vadra te pawh star campaigner-ah an tel bawk.
Karnataka Congress-a buk rit tak tak – Siddaramaiah, DK Shivakumar, Veerappa Moily, MB Patil leh Satish Jarkiholi te chu an party tana campaign tura tih an ni bawk.
Ramalinga Reddy, DK Suresh, GC Chandrashekhar, Syed Naseer Hussain, Zameer Ahmed Khan, HM Revanna, Umashree, Revanth Reddy, Ramesh Chennithala, Srinivas BV, Raj Babbar, Mohammed Azharuddin, Divya Spandana, Imran Pratapgarhi, Kanhaiya Kumar, Rupa Shashidhar leh Sadhukokila te an tel.
Assembly inthlan hi May 10-ah neih tur niin May 13-ah chhiar a ni ang.