MNF Adviser Dr R Lalthangliana’n Aizawl-a local council bye-election neihna hmunte a tlawhin MNF party worker-te chu tan la zel tura fuihin Zoram puma MNF boruak a that zel thu a sawi.
Nimin khan Aizawl-a local council bye-election neihna hmun pathum – Durtlang Leitan, ITI leh Zemabawka MNF campaign office-a party worker duty-te tlawh kualin vote thlak tawp thak thlenga party mite chu tan la zel turin a fuih.
Politics khawvelah chuan a pawimawh lai ber pakhat chu election a nih thu a sawiin, inthlanna reng rengah tling leh tling lo an awm a ngai a, MNF candidate-te an lo tling a nih pawhin chapo lo tur leh, a vanduaiah an lo tang palh a nih pawha beidawng lova tan la zel turin party mite a fuih.
Zoram pumah MNF boruak a that zel thu sawiin, “MNF chu martar-te thisenin a bual, Mizo hnam thuthlunga innghat tlat a ni a, party dang ang an ni ve lo va. Mizo hnam a ral hma loh chuan MNF chu a ral lo ang,” a ti.