Latin America police-te chuan chawlhkar thum chhungin ram 15-a a huhova beihpui a thlaknaah cocaine leh damdawi dang $ tluklehdingawn 5 man zet an man.
Ralthuam tawlh ruk pawh 8,000 chuang leh mihring 15,000 dawn an man bawk.
Hmar lamah Mexico atanga chhim lamah Argentina thlenga ram hrang hrang police tangrual chuan an thu hriatte inhrilh tawnin Interpol puihna neih beihpui an thlak a ni.
Interpol chuan mi an man hian heng lai vela gangs thiltithei tak takte chet lakna chu eng emaw chen a tihthuanawp ngei tur thu a puang.
Trigger IX tia a hming vuaha ram hrang hrangin beihpui an thlaknaah hian ralthuam tawlh ruk hai chhuah chu an bitum ber.
A tel rama mi thiam rualte chu beihpui an thlaknaa an hmunpui atana an hman, Brazil ram chhung, Argentina leh Paraguay inrinaa awm, Foz do Iguaçu khawpuiah March 12 atanga April 2 thleng an fuan khawm a ni.
An thil hriat hrang hrangte inhrilh tawnin First Capital Command (PCC) leh Mara Salvatrucha pawlten ralthuam an tawlh dante pawh an inhrilh tel.
Interpol chuan a hmain ralthuam tawlh ruk hian gangs tha a tihchak bakah pawikhawihna a tam phah niin a lo sawi tawh.
“Beihpui thlakah hian ralthuam tawlh hai chhuah chu tum ber a ni a, hemi zarah hian ruihhlo tam tak man a ni,” tiin Interpol Secretary General Jürgen Stock chuan a sawi a. Cocain leh ruihhlo dang an man hi tonne 203 zet a ni.
Mexico, Central leh South America-are mi sual pawlte hian ralthuam an nei thain tual chhung police ai pawhin an inthuam tha zawk hial thin a, hmun tam takah phei chu a thuneitu zawk nihna pawh an nei thin.
Brazil leh a thenawm, Paraguay-ah ringawt pawh PCC member-te hian lian tak taka bank rawk leh tan in atanga inchhanchhuah an ching hle.
PCC hi Brazil atanga din niin a hnuah erawh ram dangah an inzar pharh zel a, Colombia-a honeymoon a hman laia thah, Paraguayan prosecutor pawh kha anmahni thah nia rin a ni.
Mara Salvatrucha, MS-13 tia hriat bawk pawh hi Central America-a mihring hralha sumdawnnaa a hmahruaitu niin ruihhlo leh ralthuam pawh an tawlh nasa hle.
Interpol chuan beihpui an thlaknaah hian silai chelek tamna nia hriat ngai loh ramah pawh ralthuam an man tam hle tho niin a sawi.
Uruguay police chuan silai leh a kaihhnawih 1,00,000 zet manin an rama tum khata an man tam ber a la ni.
Heng thil hi European mi pahnihin an rama an thawn luh thin a lo ni a, hei hian thil hriatte inhrilh hriat a pawimawhzia a tilang chiang hle niin Interpol chuan a sawi.