Aizawl Municipal Corporation (AMC) huam chhunga veng pathum – Zemabawk, Durtlang Leitan leh ITI Veng-ah te nimin khan local council bye-election neih a ni a, chanchin buatsaih lai hian result kimchang hriat theih a ni lo.
Durtlang Leitan leh ITI Veng Local Council-ah member pakhat ve ve hmun ruak luah tur thlangin veng mipuiin vote an thlak a, member pasarih awmna, Zemabawk Local Council chu thiah a nih avangin inthlanna hi buatsaih a ni thung a. Zing dar 7 atanga vote thlak tanin, tlai dar 5 thleng vote thlak hun hawn a ni a, ballot paper hmanga vote thlak a ni.
Local council bye-election neihna hmun tlawh kualtu The Zozam Times zawhna chhangin Durtlang Leitan leh ITI Venga inthlanna buaipuitute chuan vote a tlak that thu leh inthlanna neihah harsatna a awm loh thu an sawi a. Zemabawk Local Council inthlan buaipuitute erawhin vote a tla tha lo va, chawhnu dar 3 vel thleng khan vote tla zaa 40 vel chauh a nih thu an sawi thung a. Inthlan buatsaih kawngah erawh harsatna an neih loh thu an sawi.
Nimina inthlanna Zembawk Local Council-ah hian vote nei 7,302 awmin, ITI-ah 4,595 leh Durtlang Leitan-ah vote nei 2,989 an awm a, vote tlate hi vote thlak zawhah chhiar nghal niin, he thu buatsaih lai hian result kimchang hriat hman a ni lo.