Mapuia Memorial Mizoram Cricket League-ah a che tha ngai bawk an che leh a. Gorkha Cricket Club in match thum atang a vawi thum nan hnehna an chang a, an team chakna pawh Mizoram Under-25 player Sahil Sharma leh bawk a ni.
Suaka Cricket Ground a Ningani a inkhelah Gorkha CC hian Kulikawn Cricket Club an hmachhawn a, run 31 in an hneh.
Vuak thlang zawk Gorkha CC tan an inkhel hmasa pahnih a man of the match a thlan tawh Sahil Sharma chuan bul tanin ball 61 hmachhawnin run 101 a siam. A tawp thlengin a out lo.
Dinpuitu nghet tak nei lem lo mahse Sahil-a’n a hna a thulh phah lo. 6 runs vawi nga vua in 4 runs vawi riat a vua a. Over 20 chhungin run 149 an siam a, wicket 4 an hloh.
KCC tan an player che tha lai Parvez Ahmed pawhin ball 47 atangin run 62 a siam a, nimahsela over 20 atangin an team in run 118 bak an tlin thei lo.
Gorkha bowler te zingah Rajesh Chhetri chuan wicket thum a la ve bawk.
Inkhel hnuhnung zawkah Luangmual CC in an hnehna hmasa ber an chang a, wicket 6 in Zarkawt Lords CC an hneh.
Luangmual tan Jehu Anderson chuan run 50 a siam a, hei hian thui takin an team a pui. Chak turin run 119 an mamawh chu over 19.2-ah an tlin a, wicket li hlohin run 121 an siam.