Chief Minister Zoramthanga’n hun reilo teah ad hoc school thenkhat chu provincialise tum a nih thu a sawi.
Mizoram Govt. Ad Hoc Aided School Teachers’ Union (MIGASTU) inkhawmpui lian, Vanapa Hall-a a hmanpuinaah he thu hi nimin khan chief minister chuan a sawi a. MIGASTU-in sorkara an thil beisei an thlente chu a theih leh remchan dan ang zela a hlawhtlinna tur dap a nih thu sawiin, ad-hoc aided school-te provincialise chungchangah chuan sum dinhmun zirchiang zel chunga school provincialise tura hmalakna chu a tahtawla kalpui tum a nih thu a sawi.
Chief minister chuan hripui leng leh beisei lawk loh – khuarel chhiatna te, thenawm rambuai avangtein state-in sum lamah harsatna a tawk niin a sawi a. Heti chung hian tha thlah lovin hmasawnna turin theihtawp an chhuah zui zel niin a sawi.
Ram hmasawnna atan hmathlir tha neih a pawimawh thu chief minister chuan sawiin, Mizoram pawhin ram hmangaihna tak tak nen hmathlir – tum ram nghet tak nena hmalam a pan zel a pawimawh thu a sawi.
Chief minister chuan Mizoramin zirna kawnga hma a sawn zelna tura mawhphurtu pawimawh berte zinga mi zirtirtu kalkhawm chu tha thlah lova thahnemngai taka hna thawk chhunzawm zel turin a chah bawk.
MIGASTU-ah hian khaw hrang hranga high school 129 leh middle school 64 awm mekin, thawktu mi 1,300 an awm mek bawk.