Netflix docudrama series-ah Queen Cleopatra VII chu African mi hang anga chhuah a ni a, hei hian Egypt-ah inhnialna a siam nasa hle.
Dan hre mi pakhat chuan Queens: Queen Cleopatra chuan ‘media dan a bawhchhia a, Egyptian nihna tihbo a tum’ nia puhin complaint a thehlut.
Archaeologist lar pakhat chuan Cleopatra-i hi ‘bun êng lam, mi hang ni lo’ niin a sawi.
Producer erawh chuan ‘a nihna tak hi inhnial theih tak’ a nih thu a sawi a, a changtunu pawhin, “In duh khawp lo a nih chuan en lo mai rawh u,” a ti hmiah bawk.
Adele James -i hian Twitter-a an tar lanna chhangin screengrab pawh a dah tel a, hetah hian chi thliarna rawngkai lek leka sawina pawh a lang.
Cleopatra-i hi Egyptian khawpui, Alexandria-ah BC 69-ah piangin Greek tawng hmang lalram, Alexander the Great-a Macedonian general Ptolemy-a dina lal hnuhnung ber a ni.
A pa, Ptolemy XII chu BC 51 khan thlakin BC 30-a a thih thleng ro a rel a. Hemi hnuah hian Egypt chu Roman hnuaiah a awm zui ta a ni.
Cleopatra-i nu hi eng mi nge a nih hriat theih a ni lo va, historian-te chuan Egyptian emaw, Africa khawi laia mi emaw a nih an ring ber.
Netflix-in February thlaa Tudum website-ah a changtu tura thlah pawlh, James-i an thlan thu leh hei hian kum za chuang Cleopatra-i nihnaa inhnialna awm hre renga an tih a nih thu an tar lang.
American lemchang thiam, series executive producer leh narrator ni bawk, Jada Pinkett Smith chuan, “Mi hang lalnu hmuh leh a thawnthu hriat hi kan duh lo va, chu chu ka tan chuan a pawimawh em em a. Ka fanu tan leh keini ang tan a pawimawh bawk a, hetiang hi an tam em em a ni,” a ti.
Kar hmasa khan trailer a chhuak ta a, Egyptian tam takin Cleopatra-i lema mi hang an hmang chu an sawisel ta a ni.
Egyptologist, antiquities minister hlui ni bawk, Zahi Hawass chuan al-Masry al-Youm chanchinbu hnenah, “A lem chiang lutuk. Cleopatra hi Greek a ni a, a vun hi hang lovin a êng lam a ni,” a ti.
Hawass-a chuan Egypt-a ro rel tawh zinga mi hang hriat theih chhun chu 25th Dynasty (747-656 BC)-a Kushite lalte chauh an nih thu a sawi.
“Netflix hian thil dik lo thehdarha Egyptian civilisation chu mi hangte hnuhma a ni tih tihlan a tum a ni,” tiin a sawi a, Egyptian-te chu streaming giant lakah hian na taka che turin a ti bawk.
Pathianni khan dan hre mi, Mahmoud al-Semary chuan public prosecutor hnenah complaint thehlutin ‘a tul danga dan anga hma la tur’ leh Egypt-ah Netflix service titawp turin a ngen.
Series hian Egypt-a media laws a bawhchhia niin a sawi bawk.
Kum thum kal taah khan movie siam tumah Cleopatra-i lema chang turin Israeli lemchang thiam, Gal Gadot-i thlan a nih avangin social media-ah inhnialna a lo siam viau tawh a, a changtu tur chu Arab emaw, African emaw an ni tir a ni an ti.
Gadot-i chuan, “Cleopatra-i lema chang tur Macedonian lemchang thiam kan zawng a, an awm lo va, Cleopatra-i anga chan hi a châkawm a ni,” a ti.