Bollywood superstar Amitabh Bahchan tunu kum 11 mi Aaradhya Bachchan-in a hriselna chungchang dik lo taka tarlangtu YouTube channel pakaht laka a lungawi lohna thlen chu Court-in a ngai thutak hle.
A tunu hian YouTube channel-in a nun leh hriselna chungchang dik lo taka tichhuak chu tha ti lovin heti ang laka a him theih nan court-ah a zualko.
Delhi high court judge chuan a thu thlen hi thu tlingah pawmsakin information dik lo tak miten an hmuh/chhiar theih tura pholan a nih chungchangah YouTube chu kut sil thei lovah a ngaihsak.
Filmstar lar Abhishek Bachchan leh a nupui Aishwarya Rai te fanu ni bawk hi India rama media te chawtui ber pawl niin, a chanchin leh chungchang an tichhuak tam malh melh thin hle.
Kum 2021 khan Abhishek chuan a fanu chungchanga dik lo taka puhna leh sawichhiatna reng reng a enliam mai mai dawn lova, a theih ang angin a umzui nghal chat chat thin ang, tih a lo sawi tawh.
“Mi hriat hlawh (public figure) ka ni a, a tha vek. Mahse, ka fanu hi heti anga hnuhluh theih a ni lovang,” a ti.
Ningani khan judge chuan Aaradhya Bachchan chungchang dik lo taka tarlanna video hi la thla nghal turin YouTube a hriattir a, he thil sawifiah nghal turin YouTube thuneitute leh channel operator te chu an hming hmeri hriattirna a chhuah bawk.
India ramah hian YouTube channel chhiarsen loh tak tak a awm a, mite’n milar te chanchin leh behbawm an ngaihven tih hrechiangin, thu dik chiah si lo thehdarh leh vawrhlar hluai a tam hle a, mite barakhaih nghal thut thut thei tur, thu belhchian dawl tak tak ni si lo tihchhuah leh vawrhchhuah a awm fo thin.