Rahul Gandhi-a’n mi tihhmingchhiat thubuaia hremna an pek tihkhawtlaisak tura a ngenna chu Indian court-in a hnawlsak.
Appeal a thehluh hnawl a nih avang hian Gandhi-a hian nakuma ram inthlanpui lo awm turah a chuh thei dawn em tih a chiang lo lehzual ta hle.
Kum 2019-a inthlan campaign-naa Prime Minister Narendra Modi-a hnam hming a sawi dan avangin court chuan kum hnih lung in tang turin a lo hrem tawh a ni.
Dan angin a thubuai hi ngaihtuah nawn leh tura tihna hun hawnsak niin hemi hma chuan man a ni rih dawn lo.
Gandhi-a dan hre mi, Kirit Panwala chuan court thutlukna hi Gujarat High Court-ah an khing let leh tho dawn tih a sawi.
March 23-a court-in hremna a pek tukah Gandhi-a hi parliament member a nihna pawh paihsak nghal a ni a, Supreme Court-in MP leh MLA zingah kum hnih leh a aia rei lung in tang tura hremna pekte chu an nihna hlihsak nghal tur tih thu a lo dah tawh zuia tih a ni.
Congress chuan Gandhi-a hremna pek chu sawiselin rorel lai, BJP-in a laka politics avanga phuba an lakna mai niin an puh.
BJP erawh chuan hei hi phain dan rorelna pangngai ang thlapa thil kalpui a nih thu an sawi ve thung.
Tun thla tir khan Gandhi-a hian an hremna pek hlip tur emaw, bail phal tur emaw leh an hremna chu tihkhawtlaisak tur emawin Surat court-ah ngenna a thlen.
Court-in hremna a pek rual khan a appeal theihna hun atan Gandhi-a hi bail-in a lo chhuah nghal tawh a; mahse, tihkhawtlaisak emaw, hremna pek hi tihtawpsak emaw a nih phawt loh chuan MP a nih a remchang rih lo.