Assam sorkar chuan India ram puma emergency puan laia lung ina tang mi 300 chuang chu thla tin pension lawmman Rs 15,000 a pe dawn.
Assam Housing & Urban Affairs Minister Ashok Singhal chuan Nilainia cabinet thukhawmin pension pek tur hian thutlukna an siam tih a sawi.
Singhal-a chuan Assam sorkar hian emergency hun laia lung ina dah luhte chu ‘Lok Tantra Senani’ tiin a ko tih a sawi bawk.
“Mipui rorelna a awm theih nana an inpekna te hriatpui nan vawiina Assam cabinet thukhawm chuan mi 301 hnenah thla tin pension lawmman pek turin a ti a. Thla tin Rs 15,000 pek an ni dawn a, anmahni an awm tawh lo a nih pawhin an nupuiten an dawng ang a, an lo awm lo ve ve tawh a nih chuan an fanu zinga pasal la nei lo hnenah pek a ni ang,” tiin Singhal hian a sawi a ni.
Singhal-a chuan state tam takin emergency puan hun laia lung ina dahte hnenah pension an pe hlawm tih a sawi a, “Mahse, Assam-in a pek tur hi a tam ber a ni,” a ti.
Emergency hi Prime Minister Indira Gandhi-i’n thla 21 chhung zet, kum 1975 leh 1977 inkara a puan kha a ni.