Aizawl: Zemabawk leh Durtlang Leitan-a local council bye-election neih zawh taka hnenah an chan avangin ZPM hruaituten lawm thu an sawi.
ZPM President Lalliansawta chuan Zemabawk leh Durtlang Leitan LC bye-election-ah Pathian leh mipui zarah sang taka hnenah an chang chu lawmawm a tih thu sawiin, “Hetianga hlawhtlinna kan chan theihna tura thawktu zawng zawng chungah kan lawm em em a ni,” a ti.
Lalliansawta chuan LC bye-election-a hnehna an chan theihna tur atan hian unit, group leh block hruaitute, general headquarters atanga co-ordination committee leh observation team te, a enkawltu organisation department an thawkrim hle nia sawiin, “Kan candidate leh an chhungte zawng zawng inpekna leh thahnemngaihna vangin ZPM kan ropui ve mai chauh a ni,” a ti.
ITI vengah erawh an chak zo ta lo chu pawi a tih thu sawiin, “Candidate leh party worker zawng zawngte thawhrimna kan hriatpui a, hlawhtlinna chan hun a la awm ngei ang tih kan beisei tlat a ni,” tiin, Pathian ropui ber se la, sorkar tha siam turin theihtawp an chhuah zel dawn tih a sawi.
ZPM Leader Lalduhoma chuan Pathian leh mipuite zarah a vawi thum nan, Bible-in sual tinreng bul a tih sum thiltihtheihna chu hnehin a awm leh ta tih sawiin, “Lungthu a kim ta. Campaigner zawng zawngte chungah lawmthu ka sawi e. Tumah mawi lo taka che leh tawng awm lo va, Pathian hnena lawmthu sawi tawngtai rualna kan nei thin hi hmuh a va nuam em!” tiin, ‘Ka thlarau zawkin le’ tih chu an innghahna ni zel tura a duh thu a sawi.
ZPM Legislature Party Deputy Leader Vanlalhlana pawhin a bial chhung Durtlang Leitan-a LC bye-election neihah ZPM candidate Biakkima hneh taka vote tlinsaktute chungah lawmthu sawiin, “Durtlang Leitan, Zemabawk leh ITI Venga thawktu headquaters, block, unit leh campaigner hah taka thawktu zawng zawngte chungah lawmthu kan sawi a, neutral-ten in khawngaih vote hlu tak min pek avangin kan lawm a ni,” a ti bawk.