Vawiin chawhma dar 10:45 vel khan W. Phaileng Dinthar huam chhungah motor (pik-up) a chesual a, a hmunah mi 3 an thi a, W. Phaileng damdawi in-ah mi 2 an thi bawk.
W. Phaileng Dinthar YMA hruaitu ten The Zozam Times an hrilh danin, he lirthei hi Tuipuibari II (Rajiv Nagar) atanga chhuak niin, Chakma hnam kut Biju hmang zo, Marpara South, Lunglei district lama haw tur te an chuang a. W. Phaileng Dinthar huam chhung, kawng chho ah tlan chhuak zo lovin kawng thlangah a liam ta a ni.
Chetsualna hmuna thi te hi nausen 1 leh puitling 2 (mipa leh hmeichhia) an ni a. Hliam tuar W. Phaileng damdawi in thlenpui an nih hnua thi te hi mipa leh hmeichhia niin, hmeichhia zawk hi chetsualna hmuna thi nausen nu a nih thu W. Phaileng Dinthar YMA hruaitute chuan an sawi a, lirtheiah hian chuang an tam nia sawiin, mi chuang zat chiah an sawi chian mai theih loh thu an sawi.
Lirthei chesual hi W. Phaileng Dinthar YMA leh W. Phailenga YMA branch dang member remchang apiangin a theih ang anga buaipui nghalin, thi leh hliam te chu W. Phaileng damdawi in-ah lak an ni a. Hliam zinga mi 4 chu Aizawl lama refer an nih thu leh midang chu ngaihtuahawm lutuk an awm lo nia an hriat thu sawiin, he chetsualnaa thi te hi Marpara South mi vek an nih thu leh hliam zingah Marpara South bul hnai khua ami te pawh an tel thu W. Phaileng Dinthar YMA hruaitute chuan an sawi bawk.