Aizawl : Champhai South bialtu MLA, Minister of State TJ Lalnuntluanga’n “YMA hi Pathian min pek pawl ropui tak, Zofate tana pawl hlu tak, tanpui ngai leh chhumchhiate chhawmdawla buaipui thintu, chhiat that nikhuaa theihtawp chhuah thintu, hnamdang te neih ve loh a ni” a ti.
Sub-Hqrs. YMA, Champhai inkhawmpui, Vanhnuailiana hall, Ruantlanga a hmanpuinaah he thu hi nimin khan TJ Lalnuntluanga chuan a sawi a. YMA chu hnam zia leh nunphung pholangtu leh chhawmnung tlattu a ni chu ngaihsanawm a tih thu a sawi.
TJ Lalnuntluanga chuan YMA chu thlei bik nei lova mipuite hrut rualtu a ni leh khawtlang mipuite thlamuan fotu a ni thin chu fakawm a tih thu pawh a sawi a. Pawl ngaihdan ni lova tute emaw ngaihdan ang chauha a kal mai loh nan leh a thil tum anga a kal zel theih na tura theihtawp chhuaha ven tlan a pawimawh thu a sawi.
Thenawm ram buai avanga raltlan leh Covid-19 hrileng buaipui kawnga YMA-in theihtawp a chhuah pawh fakawm a tih thu sawiin, mahni intodelh chu zahawmna leh huaisenna a nih thu TJ Lalnuntluanga chuan a sawi a. Ram hmasawn nan hlemhletna leh dan lova thil tih do tlan te, ngaihtuahna dik leh hrisel neihte chu a pawimawh hmasak thu a sawi.
YMA member-te chu mahni intodelh tum tlat tur leh mahni kea ding thei tura taimak chhuah turte, hlemhletnain a tihbuai ve loh mi nih tum turtea chahin, kut tlinglova sum lakluh leh midangte atanga thil dawng tur ringawta indah lo turtein TJ Lalnuntluanga chuan a chah.
Chhungkua, ram leh hnam tana tih theih ang te puitlin thei turin ngaihtuahna dik leh hrisel neih hmasak a pawimawh thu pawh sawiin, kum sangbi tel lo changkang tawh hnamdang leh ram dangte nena intehkhin mai lova, an dinhmun ang leh a aia sang zawk thleng thei tura taima leh rinawm taka thawk tura ngaihtuahna seng zawk turin thalaite a chah a. Mi dangte nun dan leh thil thil tihah buai mai lova, rualelna dik nena hmalam pan a pawimawh thu TJ Lalnuntluanga chuan a sawi bawk a ni.
Sub-Hqrs. YMA Champhai hi June ni 18, 2008 a din niin, a hnuaian Group pathum – Tuipuiral Group, Vanhnuailiana Group leh Vanapa Group te an awm a. Sub-Hqrs. YMA, Champhai huam chhungah branch 67 awm mekin member mipa 22,061 leh hmeichhia 13,326, an vaiin member 35387 an awm mek.