Aizawl: Serlui bialtu MLA Lalrinsanga Ralte-in Mizoram leh Assam inrina bul Vairengte dai, Vengthara cheng te electric connection man a tumsak.
Assam Police leh Mizoram Police te inkahna bul, Vairengte Vengtharah hian ramri humhalhna turin inhmun neilote tan in hmun theh a ni a, helai hmunah hian in 16 ding tawhin. chung zinga in 10 te chuan pawisa an neih loh avangin dan angin connection an nei lo. Sum harsatna avanga electric connection nelo te chu bialtu MLA chuan ama sumin electric eng a pawhsak a, nimin khan connection man hi P&E department hnenah a peksak a ni.
Lalrinsanga Ralte chuan Ramri humhalh na tha ber chu ramri bula awm khuate hmasawnna peka luah chilh zel thei tura hmalak a nih thu sawiin, Vairengte Vengthar chu Mizoram ramri humhalhna tura sorkar leh VC te tangkawpa an hmalakna a nih avangin a ngaihpawimawh thu leh an harsatna tawh te chu a theih ang anga chinfel sak a duh thu a sawi.
Serlui bialtu MLA chuan, Vairengte chu Mizoram hmel lanna pawimawh tak a nih avangin mipuite leh khawtlangin hmasawnna an hmuh theihna turin theihtawpa hma a lak thin thu a sawi a. Vengthara awm ten tui connection an neih theihna turin pipe fit vek tawh niin, tunah hian tui dahkhawlna turin tanky siam zawh tep a ni tawh niin a sawi a. Vengthar internal road pawh PCC flooring-in karleh atangin siam a ni dawn niin a sawi bawk.
Serlui bialtu MLA hian nimin vek khan Vairengte khaw chhunga zirna in pahnih St. Henry’s School leh ZD English School te hnenah tui in tur dahvawhna water cooler pakhat ve ve a pe a, a bial chhung school atanga HSLC leh HSSLC a top ten a lang an awm a nih chuan lawmpui nan Scooty pek an nih tur thu a sawi bawk a ni.