Aizawl: Chakma Autonomous District Council (CADC)-a CEM hlui, tuna MNF MDC ni mek, Amit Kumar-a’n nimin khan BJP Mizoram a zawm a, BJP CADC Election Campaign Chairman, State Core Group member ni bawkin a lawm lut.
Chawngte-a CADC BJP Office-a lawm luh inkhawmah AB Chakma chuan CADC inthlan lo awm turah BJP-in sorkarna an siam ngei dawn tih tihngheh a nihna turin ram hmangaihtu, Amit Kumar Chakma leh amah zuitu mi 600-ten BJP an zawm tih a sawi a. CADC mai ni loin Mizoram pumah MLA inthlanpui lo awm turah pawh BJP hi sorkarna fawng chelhtu an ni dawn tih a sawi.
Amit Kumar pawhin Mizoram BJP a zawm chhan chu MNF-a an hotuten CADC election lo awm turah ticket an tiam an pek loh vang nia sawiin, “Hei hian MNF leadership that lohzia a lantir avang te, an thutiamah an din tak loh avang te leh an rinawm lohzia ka hmuh hian MNF hi awm rengna chi-ah ka ngai lo a ni. Chuvangin, CADC-ah BJP-in sorkarna an siam ngeina turin kei leh ka bial mipuite nen BJP hi lawm takin kan rawn zawm ta a ni,” a ti.
Vawiin hian BJP Mizoram chuan CADC Election lo awm tura an party official candidate turte an puan hman beisei a ni.