- Mahmuaka Chhakchhuak
Tunah hian kan awmna hmun Delhi-ah chuan boruak lum leh vawt tehna lamah 37`C a ni mek a, Mizoram lamah pawh a nep bik chuang hauh loin a lum ve tho mai. Delhi khawpuia khawlum tawrh chu Zorama khawlum tawrh ai chuan hrehawm deuh tak a ni a, thlifim vawt dawn tur a awm ve loin thli thaw reng reng chu a lum zawk avangin tukverh leh kawngkhar zawng zawng khar phui veka Ceiling Fan inchhem tir chu kan tih theih awm chhun a ni deuh mai. Kan awmna tak hi Concrete Building chhawng rukna niin a bang chhim lam hi zing Ni chhuah tirh atanga tlai lam Ni tlak thlenga diptu awm hauh loa dawng char char a nih avangin a bang chhung lam chu a lum huam huam reng a, a hnaih lama thutthlengah pawh thut hrehawm khawp a ni. Sawi tawh angin Ceiling Fun hi darkar khat pawh chawl loa ‘On’ char char a niin, chhun zan zawma inchhem tir a ni chungin thlantuiin min bual reng bawk a, nun a harh tak tak thei lo a, tuisik dah vawh kan in zauh zauh reng bawk a, zan boruak daih deuh hun a nghahhlelhawm hle reng thin.
Lohtheihloha pawn chhuah a ngaih loh chuan pawn chhuah loh hram kan duh a, pawn kan chhuak a nih pawhin lukhum khum ngei ngei loh chuan Ni sa chu sa tak hi a ni. Thli thaw reng reng chu a lum huk thin avangin dawn loh hram chu medical lam mi ni kher lo tan pawh hriselna atan a that zawk a rinawm avangin facemask hren hram hram thin a ni. Mizoram lam ai chuan khua pawh a thim har zawkin tlai lam dar sarih velah hian Ni chu a tla fel tawh nain khua ala eng tha hle a, khawlaiah kan la vak sup supin pawn engah lehkha pawh ala chhiar theih a, pawn chhuah hun tak emaw tih zawk tur a niin boruak lum lutuk chu a reh deuh hlek bawk a, a nuam tawk viau thin. Hetih hunlai vel hian Mizoram lamah chuan khua a thim tawh viau mai a, zanriah eikham hun bawr vel pawh a ni awm e.
Zing lamah mawlh hian Phai khawlum chu a hrehawm thin. Ceiling fan ‘On’ chunga mu reng mah ni ila pang leh lam hi a lo thlan huh dup tho a, zing thawh hlimah biangah thlantui a luang zawih zawih nghalin kan nguai bur nghal zel tho mai. Nun a harh lo a, patling zing tho hlim pawh hi thawh fuh loh tuk a thleng ziah emaw tih mai turin biak chakawm loh tak hmel hi kan pu nghal ringawt mai zel bawk a. Naupang zing tho an han tap ringawt pawh hi Nipui laia khawpuiah chuan alo demawm loh zia kan han hre thar leh hi a ni ringawt mai. Eng thil mah ei a chakawm loh a, lohtheihlohin chaw kan ei ta fo maite chuan Phai khawlum boruak chu hrilhfiah zo kher mahsela, tlem tal chuan a hriatthiam theih mai awm e. Chhun lamah pawh pawn chhuah a huphurhawm ngawih ngawih a, tawnzau hma phel nena thutthlengseia mut thluan zuah reng mai chu thil chakawm tak a ni zawk fo thin.
Hetiang Nipui boruakah hian alawm Zoram lama Nipui boruak nawmna em em bik chu. Inchhungah thlantuiin min bual huh hle emaw kan tih pawhin tukverh hawng ila thlifim a rawn thaw heuh heuh nghal zel mai te hi sum leh paia lei zawh sen chi rual a ni mawlh lo. A man hi a to dawn lutuk a, kawmthlang Serthlum leh Theihai kung kar atanga thlifim rawn thaw lut chuan bianga thlantui luang zawih zawih chu a rawn chhem hul nghal duak a, a uar fal deuhin an kawr nghawng an han keu deuh bawkin an awmbawra hnute bu awm thiang rialte chu thlifim vawt tak chu an han chhem tir a, a chang phei chuan duh aiin a vawt lek lek hial thin. Vawkin kiang maia Zawngtah kungah te chuan Changkak rawn fuin a sawt ang zauh zauh bawk a, zan lamah phei chuan he Zawngtah kungah hian Vahluk a rawn hram fo thin bawk a, Vahluk hram hi alawm tunhma lamah kha chuan nui her her anga kan hriata kan lo hlauh thin ni. Chutianga Vahluk a hram mek lai chuan huan mawng lam atangin Sanghar ungau thawm a rawn ri bawk a, ral hla deuh taka Chirpirinu hram hlut hlut thawm pawh zan rei lamah chuan a fiah duh ngang mai.
Zoram Nipui boruakin thlifim hlutna a tih lan fiah bik dan hi ilo chhut ngai lo mai thei a, hetiang ang reng renga thlifim hlutna tilang fiahtu nipui boruak ang hi khawvel hmun dangah a awm ve a rinawm hauh loh a, a bik takin phai ram lamah chuan beisei tur a awm lo lehzualin a rinawm. Kan ram, tlangramah erawh kan tan bik liau liaua Khuanu remruat emaw tih mai turin mi chhe ber leh mi lian ber pawhin angkhat renga kan dawn turin hmun tinah a tleh heuh heuh reng a, a hlutna hrethiam lo tan chuan a tur reng emaw tih mai tur a ni lah tak a, lungleng mi tan ngat phei chuan theihai buk hnuai atanga thlifim vawt tak han dawn heuh heuh mai chu mittui tling puau khawpin suangtuahna a hruai thei hial a ni. Hla phuahmi te tan hlei hlei a sin hetiang Nipui boruaka zo thlifim thaw heuh heuh mai han dawn chu suangtuahna a ti kal thui duh hian a rinawm a, thuziak mi tan lah thu ngaihnawm leh lungkuai tak tak lo pianchhuahna remchang taka lo ni awl lo nen.
Kuthnathawk mi tan phei chuan he Nipui laia zo thlifim dawn hi a manhla lehzual. Buh alo tiak hlawm tawhin a thenah phei chuan ngal chen lai turte pawh an awm nawk tawh bawk a, chutih mek laiin thenkhatin thlam an lo sa mekin pa tuan rang deuhte chuan an pum tawh hial bawk a. Chutiang thlam namthlakahte chuan alawm thlifim thaw heuh heuh dawng chunga inngheng riala nula tlangval te an thut thin ni. Thlam tlaitlanah chuan a thenin talhkhuang an lo khawng mek bawk a, lo kuk rawih rawih tawk lah bo lo. Vaua tui vawt tui tak mai chu a thenin an lo va chawi bawk a, chutiang tui vawt tui tak mai han dawt khawlh khawlh chu manhla tak hi a ni manhla tak. Tunlaia Pepsi, Fanta leh Sprite te ai hian dang a hnawn daih zawk a, tuihal a chhawk daih zawk bawk. Luite luang ri her herte chuan engemaw sawi an nei emaw tih mai turin an ri nak nak hian a hriat a, Ni sensa vawl vawl karah chuan vah loh china Vang kung lian tak atang chuan Rengchal hram ri pawh chu fiah takin a hriat theih a, khua an ti har viau thin. Chutiang tak chu alawm Zorama Nipui boruak nawm bikna chu.
Tlai daiah kawrte tui vawtin kan han inbual a, Ni chu thlang lamah liam fel tawh mahsela khua ala eng ut tho a, hmeichhe ho eirawngbawl chu an ri nak nak a, kawmcharah Vawkpui riltam alo nguk hruih hruih bawkin naupang ho lah chu tualah an lo in um kawi zawr zawr bawk a, chung zawng zawng chu Nipui boruak ti nuamtu vek an ni. Hetiang boruak nuam leh hlu hi phai khawpuiah chuan hmuh tur a awm lo mai pawh ni loin a rim pawh hriat tur a awm lo a, tlai lam khawthim dawnahte hian khawlaite hi a reh duk zawk mai thin. Khawilai hmunah emaw chuan agarbati hal rim chu hriattur a awm zauh zauh chauh a, an pi leh pu atanga an chin than dan pawh a ni mahna le. Zoramah zawng chutiang hal rimtui chu awm ve lem lo mahsela mitin nun chu a hahdamin a nuam em em a, sumhmuna Ar lawi tur ri nak nakte pawh chu nun ti kimtu vek an ni.
Zan lam boruak mawlh hi Nipui boruakah chuan thilthlakhlelhawm tak a ni. Dul hmul khat phuarin zanriah kan han ei a, thingpui pawh in khawmuang loin kal pahin kamthuahna pik puat puat chunga veng lehlama nula rim tura kan han chhuak tur boruak nawm zia te kha aw. Vaihlo leh lehkha engemawzat hi puar luah khawpin kan ak a, kan nula rim ngei mai kan han zial tirte kha ava han hlu tak em aw. Keiniin Vawk chaw bel kan lo vil thung a, a urh palh ang tih hlau takin kan lo chawk suah suah bawk a, a khat tawkin thingpui sen hang min thlit reng bawkin tapchhak zawlah hmangaih thu sawi ngam si lo, thinlung hlim tak chung siin leng haw Ar khuan hma zawng kan han thu thin a nih kha. Zorama Nipui boruak zet chuan chhun leh zan lamah pawh ngaihtuahna tam tak min neih tir thei zawk thin si hi kan vanneihna tak pawh a ni awm e.