UEFA Champions League semi-final ah champion lai Real Madrid leh champion tumruh hle tawh Manchester City te an intawng dawn. Premier League champion lai in German champion Bayern Munich beiseina hmet mit in 4-1 aggregate in an hneh.
Nilaini zanah Allianz Arena-ah Manchester City in first leg a 3-0 a hnehna an chan tawhna chu an luhpui a. An khingpui te manager hian lehthal turin thilmak a ngai tawh ang tiin a sawi.
German team hi goal hmaah hriam deuh se thilmak chu a hnai sawt thei tur a ni a, nimahsela an huntha neih atang goal an khung theih loh an tuar.
Erling Haaland-a’n penalty a thelh hnuah minute 57-naah goal a khung a. Bayern defender Dayot Upamecano tan zan duhawm lo a ni. Norwegian defender lakah red card hmu tur a nih chu offside avangin hlihsak a ni a. Penalty a chawi bakah Haaland-a’n goal a khung hma in a bum thlu chiang hle.
Minute 83-naah Bayern Munich in handball avangin penalty an hmu ve thung a. Sadio Mane chuan Manuel Akanji ban pet perin penalty atangin Joshua Kimmich chuan an si phurh a sut a. Aggregate-ah erawh an dinhmun a danglam pha lo.
Inkhel boruak a sang a, referee thutlukna avangin team pahnih manager-te an ang chhuak fo. Bayern lam hotupa Thomas Tuchel zawk chu yellow card vawi hnih pek a nih avangin technical area atang hnawhchhuah a ni.
City manager Pep Guardiola chuan, “A zawnin Champions League semi-final vawi thum khel turin kan tling a, team tha tak lakah a nih bawk avangin ka lawm hle.”
“First half-ah khan kan kheltha lo, 4-1 hian he inkhel nihphung tak hi a hrilh lo. Mahse kan tana vanneihthlak takin chance an hloh hnem hlauh a ni. Second half-ah kan inveng tha a, kan zia sawt.” tiin an chak hnuah inkhel a thlirlet.