Aizawl: UD&PA changtu, Deputy Chief Minister Tawnluia’n nimin zing khan Ramhlun North Community Centre sak mek a tlawh a, SMART City hnuaiah Rs. vaibelchhe 500-a Aizawl khawpui cheina atana thawh mek a nih thu a sawi.
Tawnluia chuan SMART City hnuaiah Aizawl khawpui chei that hna thawh mek a nih thu sawiin, SIPMIU kaltlangin Tanhril hnuai, Setlaklui atanga tui pump-na tur an buaipui chu an zo fel tep tawh niin a sawi a. Hei hi tuna Aizawl khawpui tui lak aia tam zawk pump theihna tur niin a sawi.
UD&PA changtu, Dy. CM chuan Ramhlun North chu veng lian zinga a ngaih pawimawh a nih avangin harsa chung chungin community centre sak chu an duang chhuak nia sawiin, community centre chu state sum liau liaua thawh a nih thu te, Ramhluna mi bakah khaw 28-ah centre din tura hmalak mek a nih thu te a sawi.
MNF sorkarin mipui vantlang tana tha tur thilah chuan theihtawp a chhuah mek nia sawiin Tawnluia chuan khawtlang hruaituten ruahmanna leh rawtna an thlente chu ngai pawimawhin tlawmngai pawlte nen inrawnkhawm chunga hma an lak thin thu a sawi bawk.
Ramhlun North Community Centre hi Mizoram state fund atanga thawh niin, sak zawhna tura sum sen ngai zat tura chhut chu Rs. nuai 778.72 vel a ni a. He building hi chhawng nga niin car parking, two wheeler parking, chowkider quarters, restaurant, health sub-centre, meeting room, local council house, conference hall, badminton hall cum community hall te awm tura duan a ni.