Aizawl : Nimin April ni 21 kha India rama Civil Services Day a ni a, Mizorama sorkar hnathawk, officer ten he ni pual hian Aizawl leh district dangah hun an hmang.
Aizawla Civil Services Day lawmna, ATI Auditorium-a neih chu Chief Minister Zoramthanga’n a hmanpui a, sorkar hnathawk kalkhawmte chu mipui rawngbawl hna an thawhna kawngah theihtawp chhuah zel turin a chah a. Mipui rawngbawltu tha ni tur chuan mahni hmasial lova midang thatna tur ngaihtuah leh dawhtheihna neih chu a pawimawh ber thu a sawi.
Chief Minister chuan civil service chu mipui rawngbawlna a ni tih rilruah pai renga, mahni tanghma hai lova, mahni chunga thleng tura an duh loh chu midang chunga ti lova, rinawm taka hna thawk turin kalkhawmte chu a chah.
Mizoramin hma a sawn zelna tura sorkar hnathawkte mawhphurhna pawh Chief minister chuan sawiin, Mizoramin hmasawnna tur resource a neih hrang hrang te chu a nihna anga hman a nih theihna turin an zawn theuhah hmatlhir thui tak nei chunga thawh a pawimawh thu a sawi bawk.
Civil Services Day lawmna inkhawm hi Chief Secretary Dr Renu Sharma-i’n kaihruaiin Civil Services Day tobul leh pawimawhnate a sawi a. Thupui hrang hrang zirhovin, department website enkawl tha lawmman sem a ni a, category 1-ah Mizoram Public Service Commission website chu pakhatna niin, category 2- official Institutional Website-ah pakhatna Govt. Hrangbana College an ni thung.