Aizawl : CYMA hruaitu ten an President R Lalngheta hovinin nimin khan Zokhawthar-a raltlan camp-a awm Myanmar raltlan te an tlawh a. Sub Hqrs. YMA, Champhai hruaitute bakah Tuipuiral group YMA leh Vanhnuailiana group YMA hruaitu ten an tawiawm bawk.
YMA hruaitute chu Zokhawthar khawtlang hruaitute nen inkawmin, CYMA President R. Lalngheta chuan, Zokhawthara Myanmar raltlan awm te dinhmun chiang tak hriat an duh avanga tlawh an nih thu a sawi a. Raltlan awm rei tawh leh awm nghet deuh te chu ei leh in anmahnia an indap theih dan tur kawng zawnho tha an tih thu a sawi.
CYMA President chuan “Raltlan an pung zel a, tanpuitu an tlem tial tial a, tan lehzual a ngai dawn khawp mai” a ti a. “Kan unaute an ni a, kan unau ten min rawn bel a nih chuan kan hnar tur a ni lova, kan theih ang angin kan lo tuamhlawm tur a ni.” a ti.
Zokhawthar-ah hian raltlan 5604 an awm mek nia thudawn a ni a, Zokhawthar khelmualah an chen lailawkna tur siamsak niin, an len loh avangin hmundanga sawn tum an ni a, a sawnna tur in pawh sak mek a ni. Zokhawthar-ah hian raltlan an tam avangin harsatna pawh chi hrang hrang an tawk mek nia thudawn a ni bawk.