Aizawl: Home Minister Lalchamliana’n nimin khan Kawrpuichhuah a tlawh a, Kawrpuichhuah kaltlanga India leh Bangladesh insumdawn tawn theihna tura ruahmanna tipuitling turin ram pahnihin inremna an siam zulzuia hma lak zel a ngai tih sawi.
Zan khat riaka Tlabung tlawha zin, home minister chuan Bangladesh nena insumdawn tawnna tura ruahmanna tipuitling turin Mizoram sorkarin theihtawp a chhuah zel tih a sawi a, “Mizoram Chief Minister Pu Zoramthanga bakah, Commerce & Industries Minister Dr. R Lalthangliana-te pawh tum eng emaw zat Bangladesh-ah an kal tawh a ni,” a ti a, Bangladesh atang pawhin an Commerce Minister Tipu Munshi leh official pawimawh dangten Kawrpuichhuah pawh an tlawh tawh thu a sawi.
Kawrpuichhuah Integrated Check Post-in a ken tel, inkalpawhna lei dawh kai tur chu a ruangam duan danah tihfuh tawk loh a awm vanga tihthat leh mek a nih thu leh, ruahman ang chuan home department pawhin Immigration Check Post bun an tum thu a sawi a, ICP chu a nih dan tur ang a nih hunah ramri bula awmten nasa taka an chhawr tur thu leh, eizawnna remchang pawh zau taka a inhawn tur thu a sawi bawk.
Lalchamliana chuan remna leh muanna a awm loh chuan hmasawnnain a tuar phah tih sawiin, Bangladesh ram lama chengte nen inlaichinna tha tak neih tum turin mipui kalkhawmte a chah a, boruak ralmuan lohnaah chuan mihring tam takin nunna an chân thin avangin, chu chuan nun a tihnawm loh thu leh hmasawna thlenga a nghawng thin thu a sawi.
Home minister hi IGP (Hqrs.) John Neihlaia, DIG (Southern Range) H Ramthlengliana leh Lunglei SP Rahul Alwal ten an tawiawm a. West Tuipui bialtu MLA Nihar Kanti Chakma-hoin party hruaituten an lo dawngsawng a ni.