Prime Minister Narendra Modi chuan Sudan-a tual chhung indona awm mek chungchangah Zirtawpni khan mi pawimawhte biain thuneitute chuan Indian tangkhang mekte hruai chhuah hna thawh dan tur dap zung zung turin a ti.
Video confence hmanga inkawmnaah hian External Affairs Minister S Jaishankar, National Security Advisor Ajit Doval, Ambassador of India to Sudan Ravindra Prasad Jaiswal leh mi pawimawh dang eng emaw zat an tel.
Sorkar thuchhuahin a tar lan dan chuan Modi-a hi Sudan-a thil thleng mek chu a hmun atanga report pek niin he rama Indian 3,000 chuang awm mekte himna chu ngaih pawimawh ber a nih thu leh an awmna chin hriat chhuah chu hna hmasaah neihin hma lak mek a ni.
Prime minister hian kar hmasaa inkahna thleng avanga silaimu tawng fuha Indian thi ta a tawrhpui thu a sawi bawk.
Modi-a hian thuneitute chu thil thlengte vil reng tur te, Indian hruai haw hna leh a tul anga puih dan dap zel turin a chah.
Prime minister hian Sudan chhehvela awm ramte nen pawh inbiakpawh reng a that thu leh Sudan-a Indian awm zat pawh chiang lehzuala hriat tum ni se a ti bawk.
Zirtawpni vek khan External Affairs Minister Jaishankar chu UN Secretary-General Antonio Guterres nen Sudan-a thil thleng mek leh boruak a that loh dan sawiin an inbe bawk.
Indian sorkar hian Sudan-ah chuan ‘boruak a tang hle’ tih sawiin a mite himna leh damna chu a ngaih pawimawh ber niin an tana thawh leh hruai haw chu a hna hmasa ber a ni.
India ang bawkin ram dangte pawhin an mite hruai haw lam an buaipui mek hlawm a. US Defense Department chuan Ningani khan Sudan chhehvelah an sipai an chhawp tawh tih sawiin. ‘him leh tha taka US Embassy-a thawkte an hruai chhuah theih ngei an inbeisei’ tih an sawi.