Myanmar sipaiten mipui sorkar paih thlaa thuneihna an chan hnuah, anmahni duh lohna lantirtu an beihna kal zel avangin mi nuai 2.5 vel chenna in leh lo nei lovin an awm phah mek.
United Nations rights envoy chuan February 1-a Asia chhim chhak lam ram sipaite chet lakna hnua an dinhmun hi sawiin tun thlengin sipai duh lohna hi lantir zui zel a ni.
Myanmar-a UN special rapporteur Tom Andrews chuan khawvel ram dangte chu Myanmar-a nunau mangangte tana che chhuak thuai turin a sawm bawk.
“Nunau tam tak puih ngaih hi khawvelin a ngaihven thuai a ngai,” a ti.
UN aiawhin Myanmar mipuite tana ngenna a siam mek lai hian an thenawm ramte chuan Indonesian khawpui, Jakarta-ah Inrinni hian intawhkhawma Myanmar dinhmun hi sawi an tum.
Ram 10 telna, Association of Southeast Asian Nations (ASEAN) hian an zinga tel ve, Myanmar-a thisen chhuak nasa lutuk chu an sawiho dawn a; mahse, an pawl hian member ram dangte ram chhung thila inrawlh loh chu an kalphung neih sa a ni thung a. Civil mi tam tak thah hi eng angin nge an hmachhawn dawn tih erawh hriat a ni lo.
Sipai thupuangtu chuan nimin khan ASEAN summit-ah hian Senior General Min Aung Hlaing a tel dawn tih a puang a, ani hi an rama sipaite chet laknaa a mawhphurtu ber a ni.
Sipaite hian tun hnaiah mi tang sang tel an chhuah zalen a, an zingah hian tun hnaiah anmahni duh lotu an mante erawh an tlem hle.
Sipai lamtang television broadcaster, MWD chuan Thawhlehni khan home affairs ministry chuan anmahni duh lotuten an din, National Unity Government (NUG) chu dan lo a nih thu an sawi.
Kar hmasa khan mipui rorelna duhtu, parliament member thenkhatte chuan NUG hi an din.
NUG hian anmahni hi Myanmar-a thuneitu dik tak zawk an ni tiin Jakarta-a summit neih turah pawh sawm tur zawk an nih thu an sawi.
ASEAN-a tel ram roreltute pawhin NUG hi sawm tur zawk niin an sawi ve bawk.
Human Rights Watch pawhin member 10 awmna pawl hian sipai sorkar an sawm chu hnuk kir leh turin a ti.
“Ram hrang hrangin a chet dan avanga an hrek mek, Min Aung Hlaing hi sorkar leh sorkar inbiaknaa tel tur a ni lo,” tiin HRW-a an hotu pakhat, Brad Adams chuan a sawi.