Nagaland school education department chuan an hnuaia thawkte chu phalna nei lo chuan an thawhna hmuh chhuahsan lo turin a hriattir.
Department-in thuchhuah a siamah an hnuaia thawkte chu khauh taka an thunun thu tar lan a ni.
Thupek a siamah zirtirtu leh thawktu dang – DEO/Sr. SDEO/SDEO te chu an thawhna hmunah an hna thawk tura awm reng tura tih an ni.
“Tumah thuneitute hnena phalna nei lo chuan mahni thawhna chhuahsan loh tur,” a ti.
Zirtirtute chu Class I leh VIII zirlaite tan an zirlaibu behchhanin explanatory note, worksheet, assignment leh a dangte siam vek turin a ti bawk.
Sikul head-ten note, worksheet/assignment leh a dangte chu chawlhkar khatah vawi khat emaw, vawi hnih emaw tal zirlai nu leh pate hnenah, tum khata pawl inang lo zelin, sorkarin hri leng inkaihhruaina a siam dungzuiin a pe chhuak tur a ni,” an ti.
“Zirlai nu leh pa leh zirlaite chu worksheet/assignment thehluh hun inang lo siamsakin a hun tur chiang taka hrilh tur,” a ti bawk.
Sikulin worksheet/assignment a la khawm leh vek ang a, note, worksheet/assignment leh tul dang bakah a hmaa worksheet/assignment an tih tawhte dinhmun a hrilh zel bawk turin a ti.
Zirlaite chu sikul an kal theih rih loh avangin nu leh pate chu worksheet/assignment ngai pawimawh turin an ngen.