Myanmar ram buai avanga Mizorama awm mek zingah Farkawn khuaa piang anga birth certificate nei an awm avangin hemi chungchang chhui fiahsak turin Farkawn Joint YMA-in Dungtlang Police Station-ah FIR an thehlut.
Farkawn Joint YMA hruaitute chuan Myanmar ram buai avanga Mizorama awm mek zingah Benjamin Sum-a’n Farkawn khuaa piang anga birth certificate neih thu leh he thil hi ram dan bawhchhiatna thil a nih avangin chhuichian sak turin vawiin khan Dungtlang Police Station-ah FIR chu an thehlut tih The Zozam Times an hrilh.
Mimala huat an neih loh thu Farkawn Jt. YMA hruaitute chuan The Zozam Times an hrilh a. Dan kalha he birth certificate siam tura buaipuitu an awm ngeia an rin thu leh chu chuan midang pawh sum siamna atan hmanga dan kalha birth certificate an neihna tura a buaipui zel mai te pawh an hlauh thu sawiin, he thil hi chhui chhian ngei tula an hriat thu an sawi.
Farkawn Joint YMA chuan nimin lam khan thuchhuah siamin, Myanmar lama Zohnahthlak ten harsatna an tawh chungchangah an tlanchhe ngai dawn lo tih an lo tarlang tawh a. Hetih rual hian dan pela thil tih leh diklo taka hmalakna erawh an do zel tur thu pawh an thuchhuahah chuan an tarlang bawk.
Farkawn-ah hian Myanmar raltlan chhungkaw 203 vel awm mekin, an vaiin mi 1812 vel an cheng mek a. Myanmar sipai ten thlawhna hmanga CNA Camp, Camp Victoria an bomb hnuah raltlan chhungkua anga chhiar theih 173 vel aṭangin mi 599 vel an luh belh thu Farkawn Jt. YMA hruaitute chuan an sawi bawk a ni.