East Jerusalem-a Jewish kal fir pawl, Palestinian leh Israeli police intihbuaina chhuakah mi 100 chuang an inhliam.
Buaina hi police-ten Palestinian leh Jewish fir pawlte intihbuai an thelh tumna atanga chhuak a ni.
Hnam leh sakhua avanga inepna boruak tang tak awm rengna, Israeli-ten an luah hmunah hian buaina a chhuak ta vak a ni.
Intihbuaina hi Ningani zana Jewish fir pawl pakhat, Lehava an tih pawla miten Jerusalem khawpui hlui zawk luhka, Damascus Gate pana kawng an zawha gate bula Palestinian tam tak lo pung khawmte hmaa, “Arab-ho thi rawh se,” tia an au rual atangin a ni.
Lung leh um ruakin an invawm tawn a, police pawhin a hnawh darh nan stun grenade, mittui tlakna hlo leh tui silai an hmang.
Palestinian Red Crescent chuan Palestinian 100 velin hliam an tuar niin an sawi a, police pawhin officer 20-in tlian an tawrh thu leh mi 50 chuang man an nih thu an sawi.
East Jerusalem-ah hian April 13-a Muslim thla thianghlim, Ramadan a intan atang khan boruak a tang hle a. Palestinian-te hian Damascus Gate-ah police-ten chhun ên laia an chaw nghei tur dan an tum nia sawiin an intibuai a. Police erawh chuan hetia an tih chhan hi Old City-a kea kalte tan a awlsam zawk nan a nih thu an sawi.
Judate pawh hi TikTok video thenkhata Palestinian-ten Orthodox hnam an sawisa lai langte chuan a tithinrim zual a. He videos hi Lehava-in Damascus Gate pana kawng an zawh chhan pawh hi nia hriat a ni.
Tun kar chhung hian Jerusalem-ah Judaten Arab kut an thlak a thleng nual a. Juda tlangval pakhatin Arab huatna thu a chhuahpui chunga Arab driver a sawisak pawh a awm.