Kum 5 chhung atana kan ram kaihruaia thuneihna chelhtu tur kan thlan hun tur chu a ni telin a hnai zel a. A lo berah thlaruk bakin min kar dan ta lo. Kan political party te pawh an insing sa sauh sauh a. Bial hrang hranga an chak theih dan tur chhiarkawp chawkin an buai hle bawk. Tun kum inthlan chu a tlangpuiin party ten an party chhung mite aiin pawn lama mi hmingthate candidate atan an zawng nasa niin a lang.
Pawimawh ber erawh chu khawi party pawh hian sawrkarna lo chang sela eng angin nge kum 5 chhung kan ram kaihhruai an tum tih hi mipuiin kan hre chak a. Sawrkar lo awm leh turah chuan eng lam hawiin nge kan kal dawn tih lanna ber tur election manifesto hi a ni. Manifesto in ziah that siak ngawt ni lo, manifeso tihhlawhtlin theih ngei party te hian han chhuah sela. Duhthusam ziak khawm ringawt leh a tak rama tihhlawhtlin theih chin thliar thiam pawh mipuiin kan lo tum dawn a ni. Manifesto a an thuziak chu hma takin mipuiin kan lo zir ang a, chuti chuan vote thlak awmze nei a chhuak mai ang.
Party te hian an manifesto hi an tan home work bu a ni tih hre tel nghal bawk se la. An thil tum leh tihhlawhtlinna kawnga theih tawp chhuah tur MLA rual nei turin an manifesto hi bel se la. An sawrkar chu tih tur tum mumal neia thlan tlin an ni tih an inhre tur a ni. Chutih rual chuan an hotute leh workers rual pawhin contract thawk tur leh mipui chunga leng turin kan thlang tling lo tih an hriat lawk a ngai bawk. Hun kal tawh kan thlir kir chuan party workers te tum ber chu ram mipuite tana hnathawh aiin anmahni mimal hmasawnna ngawr ngawr an thlir ni berin a lang a. Khatiang rilru kha ramhluizia tiin kan sim tawh tur a ni. Kan ram a tluchhe mek a. Chu dinhmun atanga inkhaichhuah chu kan mamawh takzet tawh. Mahni thutiam tihlawhtling thei lo tur hi chuan politics huang pawh hi dai lo sela kan ram tan hmasawnna a ni ngei ang.