Boxing khawvel a vawrh lar chak tak, WBC interim lightweight champion lo ni tawh Ryan Garcia chu a vawikhatna atan a tlawm a. Gervonta Davis laka round sarihnaah knockout hmangin a chak lo.
Pathianni tuka Las Vegas a inhnekah WBA (Regular) lightweight champion Gervonta Davis-a’n catchweight a inhnekah hian hnehna chiang takin a chang a. 136 pounds-ah inhnekin kum 24 mi Garcia hi vawi 25 a inlan atanga vawikhat a tlawmna a ni.
Garcia hi pumrua a lian zawk nimahsela veikhawr Davis-a’n a thiam leh kutthlak na leh rang a chhawr a. Round sarihnaah a kut veilamin rang takin Garcia nakah a hnek a. Ding zui thei tawh lovin inhnek tihtawp a ni.
Kum 28 mi Davis hi vawi 29 a inlanna niin a la chak vek a, vawi 27 knockout a a chakna a ni chiah bawk.
“Boxing tihming thatu, a hmel lanna leh an hmatheh ber hi ka ni tawh. Super Bowl a Rihanna zai kha ka en a, khatiang kha ka la ni ve ang tiin ka rilru ka siam a, tunah chumi hun chu kan thleng ta a ni.” tiin Davis chuan a sawi.
Weight class pathum a world title panga la tawh Davis a hmachhawn thei chu Garcia chuan a lawm thu a sawi a. “Ka insiamtha thei ngang lova, ka rin loh lam atangin min hnek chiang em a ni. Thawh ka tum a, ka thei ngang lo.” a ti ve bawk.