Sikh sakhaw thuhriltua inchhal, India ram atanga Sikh a indan theih nana beitu ni bawk, Amritpal Singh chu Punjab-ah man a ni ta.
Kum 30 mi hi March 18-a Punjab-a man tum a nih atang khan thla khat chuang a tlanchhe char char tawh a ni.
Amah leh amah thlawptute chu mi thah tum leh police beia puh an ni.
Punjab Police thuneitute chuan an man thu hi Twitter-ah an tar lang a, buaina siam lo turin mipuite an ngen bawk.
Amritpal0-a hi Moga district-a Rode khuaah Pathianni zing dar 6.45 vel khan man a ni tih an state-a Inspector General Sukhchain Singh Gill chuan thuthar lakhawmtute hnenah a sawi.
National Security Act (NSA) tlawh chhana man a ni a, he dan hnuaiah hian an thiltihsual sawi awm lo pawhin kum khat thleng mi man theih a ni a. Assam-a venhimna khauh tak hnuaiah Dibrugarh-a lung inah dah a ni dawn a, hetah hian a hmaa amah thlawptu an lo man tawhte pawh dah an ni.
Amritpal-a hi a hoten February thlaa an mite an man chhuah phuta police station an luhchilh atang khan a thawm hi hriat lansarh lehzual a ni.
Sikh sakhaw zuitute tana ram hran phutna hi kum 1980 chhova inlak hran tuma helna ang chi kha niin kha thil avang khan Punjab-ah mi sang tam tak an lo thi tawh.
Sikh mite tana ram hran neih phuta che, Khalistan movement thlawptu a nih thu amah pawhin a sawi tawh thin a, he movement hi Jarnail Singh Bhindranwal-a tihchhuah niin Indian sorkar chuan kum 1980 chhovah khan ralthuam nena tihtawp turin a lo bei chiam tawh a. Bhindranwale-a pawh Indian army-in kum 1984 khan Sikh sakhaw hmun thianghlim ber, Golden Temple an luhchilhnaah an that a ni.
Amritpal-a man tum hian India hmar lam hmun zau tak chu thlithlai a ni a. Delhi bakah Punjab, Haryana, Uttar Pradesh leh Uttarakhand-ah inzar pharh a ni a. Nepal ram pawh India-in a ngen angin inrintir an ni bawk.
Police-in man an tum hmasak ber chu March 18 kha niin police sang rualin an hual a, lirthei kal vel pawh dangin lirthei pawh uluk taka endik a ni.
Hemi tum hian a tlanchhuak thei hlauh va, car-in nasa takin an inum a, hei hi amah zuituten online-in live-in an tichhuak nghe nghe a. A tlan chhuah theih hnu lawk atangin Punjab-ah internet tihthih zui niin mi maktaduai 27 vel chenna state-ah mipui chevel khuahkhirh a ni a, amah thlawptu tam tak man zui an ni a, thenkhat erawh chhuah lehnghal an ni.
Sikh mite zinga rorelna sang, Akal Takht pawhin Amritpal-a hi inpe mai tur leh amah an chhuinaah an puih tur thu an sawi.
Thuneituten Amritpal-a leh Khalistan thlawptute an man leh an hren chiam chungchangah hian sorkar pawh demna a awm hman nual bawk.
Canada-a awm Sikh-te chuan Punjab sorkar chet dan duh lohna an lantir a. London-a Indian High Commission-ah pawh India hnam puanzar intar pawh thlak a ni a. He thil thleng hi India chuan na taka demin New Delhi-a UK palai, deputy high commissioner pawh thil thleng sawi fiah turin an ko hial.
San Francisco-ah pawh Khalistan thlawputen Indian consulate an suasam a, Amritpal-a chu a chhuah an phut.
An man thuak hnu chawlhkar rei vak lovah Amritpal-a hian video a tichhuak a, a awmna hmun erawh hriat theih a ni lo va, man tuma an umna chu ‘Sikh mite beihna’ tiin a sawi a. Amah leh a zuitute laka NSA hman chu ‘fair tawk lo’ a tih thu a sawi bawk.