Aizawl : Mizoram Pollution Control Board leh Mizoram EIACP Hub tangkawpin Zirtawpni khan ‘Earth Day’ denchhenin Mizoram New Capital Complex (MINECO), Khatlâah hmankhat daih sarâng (single use plastic) bawlhhlawh thenfai hna an thawk.
Hnatlângah hian MPCB staff 45 chuang thawk chhuakin group hrang hrangah inthenin MINECO huam chhûnga kawng dung leh luikawrtea hmankhat daih sarâng bawlhhlawh thahnem tak an chharkhâwm a, bawlhhlawh sawngbâwlna hmun Tuirial-ah an paih a ni.
Earth Day hi Inrinni khan ni mahse, pisa chawlh ni a nih avangin Zirtawpni-ah he ni denchhena hnatlanga hi an kova. Earth Day hi April ni 22 khan khawvêl pumah ‘Invest In Our Planet’ tih thupui hmangin an hmang a ni.
Earth Day denchhen hian Mizoram EIACP Hub chuan Mizorama zirlai Eco-club te tân ‘plastic bawlhhlawh tihrêm leh plastic thlâkna tur’ tih thupui hmangin online-in article drawing-a inelna leh leh poster insiamsiak an buatsaih bawk.