Aizawl: India rama Gram Panchayat (Village Council) hnathawk tha thlana pakhatna lawmman dawngtu, Ngopa Village Council member-te lawmpuina hun Inrinni khan neih a ni.
India rama Gram Panchayat 2,55,000 vel zinga hna thawk tha thlanah Ngopa VC hian Nanaji Deshmukh Sarvottam Panchayat Satat Vikas Puraskar (NDSPSVP) lawmman pakhatna an dawng a; April 17, 2023 khan New Delhi-ah President Droupadi Murmu hnen atangin Ngopa VCP K Lalremsiama’n a dawng.
New Delhi-a lawmman inhlannaa kal Ngopa VC member-te hian Inrinni khan Lengpui Airport thlengin Ngopa Welfare Committee, Aizawl leh Ngopa Students’ Union hruaituten an lo hmuak a. Hemi hnu hian F Rodingliana, Assistant Secretary, Ngopa Welfare Committee inah lawmpuina hun an hmang.
Lawmpuina hun an hmanah thu sawiin Ngopa VCP K. Lalremsiama chuan India ram puma VC hna thawk tha thlana pakhatna lawmman dawng thei tura an hmalakna teah harsatna tam tak an paltlang tih a sawi a. “Buaina hrang hrangin Ngopa khawtlang min tlakbuak kara khawtlang tana ke kan pen hram hramna hian harsatnain lawmna a lo hring chhuak a ni,” a ti.
Malsawmna an dawn theihna atan hian Ngopa khawtlang bakah sorkar department te an pawimawh vek tih sawiin K Lalramsiama hian, “VC te enkawltu ber (Nodal department) LAD te, RD department leh line department dangte nena thawhhona tha kan neih vang a ni,” tiin, kawng tinrengin an hmalakna tuipuia an phurpui avanga hetiang dinhmun thleng thei an nih thu a sawi.
India ram puma VC hna thawk tha thlana tun tuma pakhatna an lak chu an bul tanna chauh a nih thu sawiin Ngopa VCP hian, Ngopa khawtlang thatna tur leh a chhulchhuak tlang hrang hrangte tan a theih ang zela hma an lak tur thu a sawi a. “Kan lawmman pawisa fai dawn hi a tlakna turah kan hman a ngai,” tia sawiin, Ngopa khuain hma a sawn theihna tur atan ngaihtuahna seng a, inlungrualna leh inhmangaihna te nen, Pathiam malsawm tlaka thawhho zel a tul thu a sawi.
F Rodingliana pawhin, Mizoramin tehna hrang hranga a chhe lamah a lan reng laia Ngopa khawtlangin India rama VC tha ber lawmman pakhatna an dawng thei chu Mizoram tan a tha lama bul an tanna ni thei se a duh thu a sawi hnuah, lawmpuina hun an hman hi a khar a ni.