Tripura-a Dhalai district chu thlipui leh ruahin a nuai a, mi sang chuang an buai hle.
Thawhlehni zan khan Dhalai district-a Kamalpur sub-division chu na takin thlipui hian a nuai.
Kamalpur bakah Asharambari pawhin an tuar bawk.
“Asharambari-ah hian chhungkaw 19 vel chuan thlipui leh ruah avanga chhiatna thleng an tuar a ni,” an ti.
“An chenna in a chhia a, thingkung leh electric ban a tlu a. Thuneitute thleng thuaiin kawng hnawhtute an thian fai nghal a. Power supply pawh a mumal leh tawh,” an ti bawk.
Kamalpur-ah hian ruah leh thli bakah rial pawh a tla nasa hle bawk.
“Kamalpur sub-division huam chhunga hmun tam tak chu a kalkawngah thing tlu laksawn theih rih loh a la awm avangin tlawhpawh theih an la ni lo va. Electric pawh a la mumal thei lo,” an ti.
“Rial a tla tam hle bawk a, hei hian mi za tel fe a tibuai bawk,” an ti a. Rial hian in chung thahnem tak a den chhiat avangin mi tam tak an buai phah a ni.
Chenna tur in nei remchang rih lote tan hian relief camp siamsak an ni.
Khualrel chhiatna thleng avanga thil chhia leh chânte endika a tul anga hma la turin district thuneitute chuan a hmun hi tlehin an en fiah.
Chhiatna thlenna hmuna chengte chuan state sorkar atanga puihna an phut thu an sawi.
Met department chuan Tripura-ah hian ni hnih lo awm leh tur chhung chu ruah a la sur dawn niin an sawi lawk bawk.